Gibaharan sa Department of the Interior and Local Government (DILG) si Gobernador Gwendolyn Garcia nga ilang pugson pagsunod sa mga nasudnong protocol mahitungod sa coronavirus disease (COVID-19).
Ang hulga giluwatan ni Undersecretary Epimaco Densing III human gipadayag sa gobernador ang iyang kasuko batok sa tulo ka mga doctor nga nagsilbing consultant sa Department of Health nunot sa rekumendasyon niini nga ipaubos ang Sugbo sa lockdown tungod sa pagsaka sa mga kaso sa COVID. Matud ni Densing nga si Garcia ug ang tanang mga local chief executive sa nasud angayang mosubay sa mga lagda nga luwatan sa Inter-Agency Task Force for the Management of Emerging Infectious Diseases.
Way dautan sa gibuhat ni Garcia nga pagdepensa sa mga Sugboanon gikan sa dili makatarunganon nga rekumendasyon pagpaubos sa Sugbo sa lockdown. Ug alang nako husto ang lakang sa gobernador pagsalbar sa himatyon nga ekonomiya sa Sugbo tungod sa nahitabong lockdown niadtong mga unang buwan sa pandemya.
Dili sayon ang lockdown alang sa mga kabus nga nagsalig lang sa inadlaw nilang kita aron dunay makaon ang pamilya. Tingali sayon ni alang ni Densing ug sa mga doctor nga mihimo sa rekumendasyon tungod kay dili man magutman ang ilang pamilya.
Akong gihagit si Densing ug ang mga doctor nga mirekumendar og lockdown nga mosuroy ug makig-uban sa labing kabus nga mga pamilya nga nagsalig sa matag-adlaw nga kita aron mabuhi.
Nakasabot ug nakita sa gobernador ang maong sitwasyon sa mga Sugboanon hinungdan nga isip inahan sa probinsiya iyang gipanalipdan kutob sa mahimo nga mosamot ang pag-antos sa mga kabus.
Tataw sab nga kuwang sa pagtuon sa sitwasyon dinhi sa Sugbo ang mga mirekumendar og lockdown. Tinuod dunay pagsaka sa mga kaso sa COVID apan kasagaran niini dia sa dakbayan sa Sugbo nga dili sakop ni Garcia. Kun wala masayod si Densing nga dili ubos sa hurisdiksiyon ni Garcia ang dakbayan sa Sugbo, dili pa awahi ang tanan aron salbaron ang iyang kaugalingon sa dakong kauwawan—pamutos ug resign isip undersecretary sa DILG.
Hain sab kahay maayo og atong balihon ang sitwasyon, si Densing ug ang mga opisyal sa kaulohan nga way hibangkaagan sa tinuod nga sitwasyon dinhi sa lalawigan ang mohilom og mosunod unsay gustong mahitabo sa lokal nga mga opisyal nga maoy labaw’ng nasayod sa ilang kahimtang.
Ang angayang buhaton sa DILG mao nga abagan ang mga LGU inay nga manghilabot. Angayang hinumduman ni Densing nga siya tinudlo lang sa pwesto samtang si Garcia ug ang ubang mga lokal nga opisyal pinili ug dunay mandato gikan sa katawhan nga angayang respitohan sa DILG.