“I will fight for Cebu and the Cebuanos, for their livelihoods and for their lives.” Mao kini ang pulong ni Cebu Governor Gwen Garcia sa rekomendasyon nga ipaubos na usab sa lockdown ang Sugbo.
Kini gikan sa tulo ka mga doktor nga consultant kuno gumikan sa nagkataas nga kaso sa COVID-19 ug sa gikataho nga local mutation sa virus.
Misamot ang kalagot sa gobernador dihang adunay usa ka doktor ang misugyot nga dili na pagawason sa Sugbo ang mga Sugboanon.
Gihulagway kini ni Garcia nga usa ka diskriminasyon bisan og walay basehan sanglit gi-estudyohan pa man ang kadtong giingong local variant.
Maayo nalang kay gidespensahan ni DOH 7 Director Jaime Bernadas ug Dr. Mary Jean Loreche ang Cebu ug gipamati usab ni Secretary Francisco Doque.
Gipadayag ni Garcia nga dili siya ug ang mga Sugboanon mosugot kong ibalik ang ka estrikto kaniadto kay mosamot na ang kalisod sa mga tawo nga daan nang nag-antos.
Sakto ang pagbarog ni Garcia nga depensahan ang pagbangon na sa panginabuhi sa katawhan tungod kay siya mismo isip inahan sa lalawigan nakakakita sa kalisod sa mga tawo.
Mao man gani nga nangita og pamaagi ang Kapitolyo aron makabangon ang mga Sugboanon sama sa programang Sugbosog ug Sugbo Negosyo.
Gibanhaw na usab ang turismo aron man lang makahatag og dugang panginabuhi sa kalungsoran.
Karon nga mituyhakaw na pagbalik ang paglaum sa mga tawo, patyon na sad pagbalik tungod lang kay gihukman nang daan sa mga experto kuno ang kahimtang nato sa Cebu.
Unsa man duna pay kwarta ang gobiyerno nga ikapakaon sa mga tawo kong ibalik og lockdwon ang Sugbo? Sayon ra kaayo sultihon ang lockdown sa mga tawo nga puno ang bugasan kay dako og kita nga mahimo ra makapalit og bisan unsa ug makagawas gawas sa pud kay mga frontliners man.
Apan sa mga yanong tawo nga magsalig sa kita sa usa ka adlaw ang kalan-on sa pamilya, impiyerno na kaayo ang lockdown.
Dili man sa wala na hatagi og importansiya ang kinabuhi nga kinahanglang panalipdan batok sa virus.
Pero sa panahon nga gutmon ang mga tawo mas angayan tutokan tungod kay basin makahuna huna og dautan ug manulis nalang kay wala may laing kakuhaan nga ibuhi sa pamilya.
Dili ikalimod nga hadlok gihapon kaayo ang COVID-19 apan hangtod kanus-a man kita magpaulipon sa kahadlok?
Dihang gi-lockdown ang mga dapit napugngan pa ang pagkatap sa virus, seguro na-flattened ang curve. Pero dili solusyon ang lockdown kon dili ang partisipasyon sa tanan sa pagpatuman ug sa pagtuman sa health protocols.