Matud pa ni IBP President Atty. Domingo Cayosa, ang pagmakuli sa gobiyerno pagbulgar sa presyo sa gipamalit nga bakuna batok COVID-19 nahisupak sa balaod ug wala magpatigbabaw sa kaayohan sa publiko. Apan matud pa usab ni Secretary Galvez, ang pagmakuli pagbulgar sa presyo naggumikan sa “non-disclosure agreement” tali sa mga supplier. Haum dinhi ang panultihon nga, “Ang sekreto sa kagawasan anaa sa pag-edukar sa katawhan, samtang ang sekreto usab sa pagpanaug-daug, anaa sa pagpabilin kanila nga wa’y kabangkaagan. Ginaingon usab nga, “Samtang ang pagpanglingla kinahanglan nga i-sekreto, dili tanang sekreto itumong sa pagpanglingla”. Limod pa more!
Seafoods na ang baboy?
Adunay nabangalan nga 29 ka patay nga mga baboy nga naglutaw-lutaw buyon sa kabaybayonan sa Oriental Mindoro. Gisutâ pa sa Provincial Veterinary Office ang tahô nga gitambog ang maong mga baboy gikan sa usa ka barko ug kon African Swine Fever (ASF) ba ang hinungdan sa pagtambog sa maong mga baboy. Nakapangutana ang akong higala nga kon ugaling walay kakulian o sakit ang maong mga baboy, unya nakuha kini sa pokot sa mga mananagat, matawag na ba ang mga baboy nga “SEAFOODS”? Atala lageee!
Repeat again twice
Gihagit ni Secretary Roy Cimatu ang mga kapitan sa Cebu City sa paghimo ug mga lakang aron mapakgang ang pagsaka sa kaso sa COVID-19 sa dakbayan. Dason pa ni Sec. Cimatu nga “kon nahimo kini sa una, walay rason nga dili kini mabuhat pag-usab.” Apan ni’ng hagit ni Sec. Cimatu, misumbalik paghagit ang akong silingan sa pag-ingon, “Kon nahimo sa una, ngano’ng wala man masustenihi ang paningkamot? Kinahanglan ba diay undangon aron usbon? Matud pa sa komedyante sa entablado, “Si’g balik”. Fezteleern!
Ilara tets!
Matud pa ni PhilHealth President Dante Gieran, nga sa gikataho’ng P15 bilyones nga pundo sa ahensya nga “gikawat,”92% na niini ang nahimoan na og sumada o liquidation sa hingtungdan’g mga opisyales. Katuohan-dili ang maong pamahayag.
Pagya na sa atong mga katiguwangan nga, “Wala’y kawatan nga motug-an”. Buot ba ipasabot ni Gieran nga boluntaryong mitahan ug mihatag ug ebidensya batok kanila ang hingtungdan’g kawani sa PhilHealth. Matud pa bitaw sa iho ngadto sa butete, “Ilara Tets, makahilo ka.” Madahaan!
Alarma sa tapolan ug tambok
Laraw sa PNP-Internal Affairs Service nga mag-instalar og “tamad” ringtone sa mga cellphone sa mga opisyales sa kapolisan aron pagpahimangno ug pag-alarma kanila pinaagi sa pagbalik-balik sa pulong nga “tamad” sa higayon nga dili pa nila maresolbar ang kaso sa nga ilang gihuptan sa gitakdang panahon.
Daghan usab sa atong kapolisan ang adunay panglawas nga maingon ta nga dili haom sa pagka-polis. Dili kaha maayo nga butangan usab og alarma ang ilang cellphone nga magsiyagit sa pulong nga, “Tambok, Tambok, Tambok”?. Hala no!