Hinay-hinay ng makita sa mga social media ang mga nagkadaiyang personalidad nga nalambigit sa politika,lokal man o sa nasyonal nga ang-ang.
Gawas nilang Pres. Duterte ug Bise Pres. Leni Robredo nagpunay na sab og gawas ang pangalan sa mga indibidwal nga kaniadto o hangtud karon naa pa sa posisyon isip elected officials. Usa kanila si Davao City Mayor Sara Duterte-Carpio kinsa makadaghan ng gihisgotan sa bisan unsang tukionon diha sa social media.
Bahin sa politika o bisan gani iyang komentaryo bahin sa mga isyung dili pangpolitika makita ug gipatik na diha sa social media. Bisan ang iyang amahang presidente nagsige na sab og hisgot bahin kaniya.
Ang presidente nagsige og ingon dili haom magpresidente ang anak ug dili sab siya mosugot nga padaganon kini pagkapresidente sa sunod eleksyon, apan daghan gyud kuno ang nagsige og dani ug pamugos.
Mura og sama sa sitwasyon niya kaniadto, dili siya gusto modagan apan daghan ang mipugos kaniya pagkandidato. Pila sab kaha ka mga politikong gustong makapwesto sa 2022 ang mosuhid sa estilo nga gihimo ni Pres. Duterte atol sa kampanya niini niadtong 2015?
Apan dili lang ang First Daughter maoy naghimo niini. Duna pay uban nga sa nangaging mga bulan wala gyud makita sa Facebook apan takulahaw lang karong naghinapos nga bahin sa tuig 2020 ug karong pagsulod sa 2021 kalit nga nahisgotan sa social media.
Makaingon gyud ta nga usa kini ka pamaagi sa pagpaila-ila sa kaugalingon usa ka tawo ngadto sa daghang mga tawo.
Sa pagkakaron, wa pay makalabaw sa gilapdon ug gipaspason sa social media kun pagpaabot o paghatud og impormasyon maoy hisgutan, samot na kun gustohon sa tawo nga magpaila-ila dili ba?
Samtang wala kanilay miangkon o moangkon sa labing duol nga panahon, nga pangandam nila kini sa umaabot nga piniliay sa 2022 way laing mabutang sa hunahuna sa publiko kondili kini ra gyud. Dili ikalimod nga hapit na ang eleksyon ug kun gusto sa usa ka politiko nga makapamundo daan, karong sayong bahin sa tuig 2021 maoy tukma. Kondisyonon ang hunahuna sa mga botante, magpaigot, papresyo dugang sa pusta unya mokalit og anunsyo sa pagdagan dalang pasumangil nga gipugos lang o napugos lang tungod ug alang sa panerbisyo.