Human gihatagan sa Food and Drug Administration (FDA) og emergency use authorization (EUA) ang bakuna sa Pfizer/BioNTech niadtong Huwebes, nabantang ang dakong buslot sa plano sa pamunoan ni Presidente Rodrigo Duterte pagpamakuna sa labing nagkinahanglan nga mga Pilipinhon batok sa COVID-19:
Wa magtagad ang Malakanyang pagpalit sa labing unang bakuna nga naaprobahan sa tibuok kalibotan. Giuna hinuon pagpirma ang kontrata sa 25 milyones ka doses sa bakuna sa Sinovac nga wa pay pagtugot sa FDA ug 30 milyones ka doses sa Novavac nga wa pa kahingpit sa clinical trials.
* * *
Lain nga mga timaan nga ang nasudnong gobiyernowa magdali o wa kahibawo unsaon pagdali ang pagpamalit og mga bakuna:
Mas una pa nga nakapirma og mga kontrata alang sa minilyon ka doses sa bakuna sa AstraZeneca ang pribadong mga kompaniya sa Pilipinas nga nitanyag sa pagpamakuna sa ilang mga kawani; ug
Mas una pang nakapirma og buwag nga mga kontrata uban sa AstraZeneca silang Mayor Rex Gatchalian sa Valenzuela City, Mayor Francis Zamora sa San Juan City, Mayor Joy Belmonte sa Quezon City ug Mayor Sara Duterte sa Davao City.
* * *
Nipasabot si vaccination czar Carlito Galvez nga gidid-an sa balaod ang nasudnong gobiyerno pag-abante og bayad sa di pa mahatod ang suplay. Maong gamiton unta niyang kuwarta gikan sa Asian Development Bank (ADB) kay ang pagdili wa man maglakip sa langyawng pundo. Apan ang ADB nitakda nga magamit lang ang utang sa mga bakunang gitugotan sa FDA.
Wa kapasabot si Galvez nganong nakalusot sa pagdili ang local government units (LGUs) ug nganong nipirma siya og kontrata sa duha ka bakuna nga way EUA.
* * *
Aron di maglaway ang mga Pilipinhon sa bakuna sa Pfizer/BioNTech, nanghangyo si Galvez sa COVAX, proyekto sa World Health Organization (WHO) sa mas makiangayong pag-apud-apod sa mga bakuna sa kabos nga mga nasud, nga i-apil ang Pilipinas sa mga unang hatdan sa bakuna.
Apan ang mga tagduma sa COVAX mosusi una unsa kaandam ang atong cold chain aron di mohupas ang bakuna. Nikumpisal si Galvez nga, sukwahi sa iyang pangangkon sa mas lapad nga kaandam, ang duna ray bugnawng tipiganan mao ang Cebu City, Metro Manila ug Davao City.
* * *