^

Naunhan sa tag-iya

BALITAHOM - Atty. Jose Marie N. Poblete (Banat) - January 10, 2021 - 12:00am

Gisaway sa mga Kongresista ang pag-insister sa IATF ug Malacañang nga wala maawahi ang Pilipinas pagpamalit sa bakuna batok sa COVID-19. Rason sa IATF nga daghan lang gyud kuno ang gipamalit sa mga adunahan nga nasud mao nga wala na mabinli ang Pilipinas.

Dula-dula ra sa pulong ang rason sa IATF. Makapahinumdum kanako sa akong amigo nga buot unta pangayoon ang botelya sa bino nga among giinom apan sa dihang nakita niya nga gihipos ang botelya sa tag-balay, igo na lang siya nga nakatuaw pag-ingon, “Ganahan unta ko sa botelya apan naunhan man ko sa tag-iya”.  Pagkatoytoy!

Ang importante, buhî!

Sumala sa report nga gimantala sa Moody’s Analytics, nahamutang ang Pilipinas sa awahi nga luna sa mga nasud sa Asia-Pacific Region nga makabangon gikan sa pandemic.

Gitumbok nga rason sa hinay nga pagbangon sa ekonomiya mao ang las-ay nga pagpahigayon sa mga ekonomikanhong polisiya duyog sa kwarantinas nga daw molanat pa’g dugay.  Niining dili maayong panglantaw sa atong ekonomiya, igo na lang intawon ang katawhan sa pagsagop sa mensahe sa pagya sa mga batan-on nga nagkanayon, “Ang importante, BUHΔ.  Fezteleern!

Ilo’ng tuwapos ang kapildihan

Human sa nahitabo’ng kagubot didto sa US Capitol, misugod na usab og kahugnô ang suporta sa mga Republican sa Washington ngadto kang Presidente Donald Trump. Apan alang kang Trump, wala siya’y nabuhat nga sayop.  Subay tingale kini sa iyang gipamulong kanhi nga “Usahay, sa imong pagkaparot sa panagsangka, makakaplag ka’g lain’g paagi pagdaug sa gubat”.  Apan ni’ng pagbiya kaniya sa iyang mga kaalyado, haum kaayo ang gisulti ni Presidente John F. Kennedy nga, “Ang kadaugan adunay daghang amahan; apan ang kapildihan, usa ka ilo’ng tuwapos”.  Weder-weder lang!

Kinsa’ng gimbuhaton?

Alang kang Mayor Edgar Labella, bulohaton sa barangay ang pagkolekta sa basura ug ang pagpasaka’g kaso ni Inayawan Barangay Captain Kirk Bryan Repollo batok kaniya mahitungod ni’ng maong isyu usa ka “barato nga gimik” kon “cheap shot”.  Human makapabuhagay sa ilang mga tagsatagsa ka baruganan, dili kaha maayo nga aduna’y moatiman sa nagpasad nga basura?  Ni’ng maong kahimtang, bulawanon ang mensahe ni Don Shula nga nagkanayon, “Ang mga maayong-laki, mobasol sa ilang kaugalingon; samtang ang mga bulay-og, mobasol sa ubang tawo”.  Baya no!

Wala’y molungtad?

Tungod sa kabalaka nga mokuyanap ang COVID-19, mirekomendar ang Regional IATF ngadto sa national IATF nga kanselahon ang tanang “physical ug actual” nga pasundayag sa Sinulog karong tuiga.  Kon uyonan sa IATF ang maong rekomendasyon, wala na’y mapahigayon nga pagsayaw sa kadalanan nga kanunay kanhi makita sa katawhan sulod sa upat na ka dekada.  Tinuod gayod ang lintunganay sa linya sa awit ni Barbara Streisand nga nagkanayon, “Some good things never last”.  Pit Senyor lang gihapon kanatong tanan!

IATF
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with