Second wave? Hinaut nga dili unta
Aniay dili maayo nga balita. Sa niaging mga adlaw, miabot na sa double-digit ang natala nga mga bag-ong kaso sa coronavirus disease o COVID-19 dinhi sa dakbayan sa Sugbo, matud pa sa rekord sa Department of Health.
Ang pagsaka sa mga bag-ong kaso sa COVID-19 nagsugod sa katapusang semana sa nakalabay’ng Disyembre, pipila ka adlaw human ang Pasko. Dili kini maayong tilimad-on. Basin sinyales na kini sa second wave sa coronavirus infection dinhi sa dakbayan.
Apan manghinaut lamang kita nga walay second wave sa tinakdanay sa COVID-19 dinhi sa siyudad sa Sugbo ug ubang lugar sa lalawigan. Kini tungod kay dili lalim ang atong nagian sa nakalabay nga napulo ka bulan sa dihang gipailalum ang Sugbo sa higpit nga community quarantine.
Hinuon ang pagduda sa tanan nga dakong hinungdan sa pagsaka pagbalik sa mga kaso sa COVID-19 sa siyudad mao ang mga kalihokan nga may kalabotan sa atong kasaulogan sa Pasko diin mabaliwala usahay ang pagtuman sa mga health protocol.
Dili nato ikalimod nga daghan ang nanggawas sa ilang mga panimalay niadtong mga panahona tungod sa pagtambong sa mga Christmas parties ug ubang kalihokan. Klaro nga kini ang hinungdan sa pagsaka sa mga kaso sa coronavirus disease.
Gani sa unang hugna sa Misa de Gallo sa wala pa ang Pasko, daghan ang nakamatikod nga nabaliwala gayud ang lagda sa social distancing sa ubang mga simbahan palibot sa dakbayan, ilabina niadtong mga nagpundok sa gawas.
Siguro daghan ang nag-anad gumikan lagi kay pipila ka bulan na silang wala makagawas tungod sa community quarantine. Mao nang morag nabag-ohan hangtud nga gikalimtan na lamang ang pag-obserbar sa mga health protocol batok sa maong makamatay nga balatian.
Karon, balik na ngadto sa double-digit ang pagsaka sa mga kaso sa COVID-19 ning atong dakbayan. Ug resulta kini sa pagkagahi usab sa ulo sa pipila kinsa mibaliwala lamang sa mga health protocol ug uban lagda nga giimposar sa lokal nga kagamhanan.
Maayo kay nakadesider si Mayor Edgardo Labella sa pagpadayon gayud sa pagpatuman sa quarantine pass. Gani, ipatuman gayud kini bisan pa man sa nagsingabot nga kasaulogan sa Fiesta Seño ug Sinulog Festival sa dakbayan.
Maayo kini nga lakang aron mapugngan ang pagkatap niining makamatay nga coronavirus disease. Kay dili na kita makatugot nga mobalik pa ang dakbayan ngadto sa higpit ug hasol nga community quarantine.
- Latest