Coasters wa kinahanglana

Aron kuno pagtubag sa kakuwangan sa public transportation dinhi sa dakbayan sa Sugbo, tinguha sa city government ang pagpalit og 10 ka coasters sa kantidad nga P45 milyones.

Ang pundo nasukip sa P985 milyones nga supplemental budget (SB 4) nga gisugdan na pagtuki sa konseho niadtong Biyernes sa miaging semana.

Ang buhatan ni Mayor Edgardo Labella pinaagi ni Joan Quiñanola mipasabot atubangan sa mga sakop sa Konseho nga gikinahanglan ang maong mga sakyanan aron paghakot sa mga natanggong nga mga pasahero tungod sa kakuwang og public transportation.

Ug sama sa gipaabot nakasugat dayon og pagsupak gikan sa mga sakop sa oposisyon diha sa Konseho ang maong plano.

Gawas nga labihan ka mahal sa kantidad sa coaster nga mokabat og P4.5 milyones matag-usa, kataw-anan ang lansis nga kini gamiton paghakot sa mga natanggong nga mga pasahero.

Nakalimot naba ang mayor sa dakbayan unsay hinungdan nganong nagkuwang ang public transportation sa syudad?

Pwes atong pahinumduman ang mayor sa rason nganong dunay kakuwangan sa public transport.

Ang hinungdan tungod kay atong gikontrolar ang pagbiyahe sa mga pampublikong sakyanan aron kapugngan ang pagkatap sa      COVID-19.

Gawas niini nagpabilin pa nga ubos sa community quarantine ang dakbayan diin limitado ang paglihok-lihok sa publiko.

Kun tinuod nga duna gyuy kakuwangan, nganong dili man ipakatap sa dakbayan ang iyang mga Kaoshiung buses?

Nganong kinahanglang gyud nga mamalit og bag-ong mga sakyanan taliwa sa pandemiya nga atong gisagubang?

Ang giingong kakuwangan sa public transport posibling matubag na sab sunod tuig human ang LTFRB mipasalig nga dunay 4,000 ka unit sa mga modernong PUJs ang gipaabot na nga makasugod pagbiyahe.

Ang maong gidaghanon, matud sa LTFRB, igo na nga makatapak sa nahanaw nga serbisyo sa traditional jeepneys.

Sa laktud wala gyud kinahanglana sa dakbayan sa Sugbo ang pagpamalit og bag-ong coasters.

Mas kapuslan tingali kun idugang ang maong kantidad sa pundo alang sa pagpamalit og libreng bakuna batok sa COVID.