Dear Atty. Divine,
Ang akong igsuon naminyo og American. Didto sila gikasal sa US ug duna silay usa ka anak.
Apan ang iyang bana nakig divorce niya 3 years ago. Ang ilang kasal wa ma-reported sa Philippines busa kun mokuha siya og Cenomar single pa gyud siya.
Karon magplano ang akong igsuon nga magpakasal pag usab.
Ang akong pangutana kun needed pa ba niya ipa recognize sa Pilipinas ang iyang Divorce Decree? Daghang salamat.
Jessica
* * *
Dear Jessica,
Aron mamahimong legal ang iyang second marriage kinahanglan gyud niyang ipa-recognize ang Divorce Decree nga nakuha sa iyang bana sa America.
Kini bisan pa kun wa ma-recorded sa PSA ang ilang marriage.
Kun mapakyas siya sa pagpa-recognize niini makonsiderar nga bigamous ang second marriage kay nag exist pa man ang first marriage sa dihang misud siya sa second marriage basi sa balaod sa Pilipinas tungod sa iyang kapakyas sa pagpa recognize niini dinhi sa atong korte.
Busa aron malikayan ang problema mas maayo nga ipa-recognize daan niya ang Divorce Decree una siya magpakasal og usab. Thanks and God bless.
Atty. Divine
* * *
Alang sa inyong pangutana palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.