Pagtugot sa mga bakuna sa COVID-19
Wa pa mahuman ang dagayday sa maayong mga balita sa kalibotanong paningkamot sa pagsagang sa pandemya. Labing uwahing pangangkon sa Moderna, bisan wa gihapoy igong detalye sama sa nahaunang mga pahibawo, gihangop dayon sa mga siyentipiko: Way bisan usa sa nahatagan sa ilang bakuna ang nahiagom og grabeng kaso sa COVID-19.
Gipagawas na sa Moderna ang kinatibuk-ang sangpotanan sa ilang clinical trials: 11 ra sa mga nabakunahan ang nataptan sa kagaw, samtang 185 ang nangasakit sa mga gihatagan og placebo; ang 94.1% nga ka-epektibo labaw sa gipaabot sa mga siyentipiko pila ka semana ang nilabay.
* * *
Mas maayo ang numero sa Moderna kon itandi sa mas unang kasayoran nga gipagawas sa Pfizer ug BioNTech:
Sa 30,000 ka boluntaryo sa Moderna ug 196 nga nataptan sa COVID-19, nahiagom sa grabeng mga kaso ang 30 sa placebo group ug way bisan usa sa vaccine group; samtang
Sa bahin sa Pfizer ug BioNTech, nga nangangkon nga 95% nga epektibo ang ilang bakuna, 170 ang nangasakit sa 45,000 nila ka boluntaryo, nahiagom sa grabeng mga kaso ang siyam sa placebo group ug usa sa vaccine group.
* * *
Tukion sa Food and Drug Administration (FDA) sa Estados Unidos ang kaluwas ug ka-epektibo sa bakuna sa Pfizer ug BioNTech unya sa Martes, Disyembre 10. Gipaabot nga tugotan ang pagpamakuna sa labing nameligro nga mga Amerikanhon pila ka adlaw human sa tigom.
Magtigom pag-usab ang FDA sa Disyembre 17 aron pagtuki sa aplikasyon sa Moderna. Sa wa pay pasko, gipaabot nga duha na ka bakuna ang katugotan sa Estados Unidos.
* * *
Mag-una hinuon ang pagpamakuna sa Britanya. Nga gitakdang mohatag og pagtugot karong semanaha sa tulo ka bakuna: Sa Pfizer ug BioNTech, sa Moderna ug sa University of Oxford ug AstraZeneca. Mosunod sang pagtugot sa European Union (EU) alang sa ubang mga nasud sa Uropa.
Nipasalig ang FDA sa Pilipinas nga mohimo sa ilang kaugalingon nga mga pagtuon sa di pa tugotan ang pagpamakuna sa mga Pilipinhon. Apan ang nag-una nga mga pagtugot sa ubang kanasuran mahimong maka-apura sa FDA sa pagpadaplin sa ilang naandan nga burukrasya. Gawas pa, nangontrata nang daan ang Malakanyang sa mga bakuna sa China ug sa AstraZeneca.
* * *
- Latest
