EDITORYAL - Pagsulbad sa mga krimen

Sa nanglabay nga mga adlaw, dunay mga report bahin sa mga tawong gipamatay. Dili lang basta ang pagpatay kanila kondili puno sa mga tanghaga ug wala pay balita kun duna na bay kalamboan sa imbestigasyon kabahin sa pagpatay kanila.

Sa miaging buwan, dunay na-report nga  mga patay’ng lawas nga nakuykoyan sa magbaw nga lubnganan sa hilit nga dapit sa Lungsod sa Compostela;  duna say babayeng giputol-putol kansang lawas gilabay sa usa ka sapa sa Talamban, ug ang ulo, mga kamot ug mga bukton napalgan sab diha sa Mandaue City; dili palang dugay, usa trabahante sa bangko ang napalgang patay sa kalibonan sa lungsod sa Consolacion.

Linoog kaayo ang paagi sa pagpatay kanila. Adunay mga nagmahal kanila nga ilang mga pamilya mao ang ilang kamatayon nakapasakit og maayo sa balatian sa ilang mga banay tungod sa ka-brutal sa paagi sa pagpatay kanila.

Kumusta na kaha ang imbestigasyon sa kapolisan bahin niining maong mga pagpatay, may hustisya kaha para sa mga biktima? 

Mas mapadali kini kun mokooperar ang tanan sa imbestigasyon aron mapadali sa mga imbestigador ang pagpanday sa kaso.

Ning bag-ohay lang, ang bag-ong pangulo sa Philippine National Police nga si Debold Sinas mimando sa paghingusog sa kampanya batok sa loose firearms tungod kay gigamit kini sa mga bayolenteng kriminal sa paghimo og krimen.  Giawhag sab niya ang mga testigos sa pagtabang sa imbestigasyon.

Gipasalig sa kapolisan nga magpabiling luwas puy-an ug haom kaayo para sa mga negosyanteng gustong mamuhunan ang Sugbo. 

Matahom ug malambuon ang Sugbo, apan  sama sa ubang mga lugar sa nasud duna sab kini mga mangitngit nga mga panghitabo nga negatibo sa pagtan-aw sa uban.

Hagit sab kini ngadto sa atong law enforcement units kun seryuso ba sila sa pagsulbad sa maong mga kaso o dili.

Bisan unsa pay backgrounds sa mga gipatay, makatarunganon sab tingali nga mahatag ang hustisya para kanila pinaagi sa pagpangita sa mga mamumuno ug mabilanggo subay sa ilang nahimo.