^

‘Go’ gipugngan sa IATF

JAV BANATI - Javier Yntig Tapulado (Banat) - November 9, 2020 - 12:00am

Halos motunga sa tuig kapin na ang giantos nga kagutom sa mga PUJ drayber. Gani, pipila kanila, hapit na lang magpakilimos sa kadalanan. Gipadaplin ang kaulaw.

Gigakos ang kasuwaw. Lamang, aron may ikasustiner pagpalit og pagkaon sa ilang pamilya.

Nakita ni Mayor Edgar C. Labella kining grabing pag-antos nga ilang gisagubang. Busa, mihatag na untag ‘Go signal’ nga ibalik na sila sa karsada.

Apan misalga si PRO-7 Director Brigadier General Albert Ignatius Ferro, miyembro sa Inter-Agency Task Force (IATF), kinsa gitahasan isip commander sa Regional Joint Task Force-Central Visayas Covid Shield.

Mitambag kini ni Labella nga dili dalidalion ang pagpabalik sa mga PUJ drivers.

Kinahanglang mag-agi unag usa ka halawom nga pag-analisar ug tun-an pag-ayo ang mga tukmang paagi sa health protocols nga angay iimplementar ug sundon kanunay sa mga drayber samtang ania, nakig-away pa kita ning virus nga daw walay pagkatapos.

Busa, importante nga ang desisyon, matud pa ni Ferro, may pagtugot gikan sa IATF. Kay isip miyembro, katungod sab ni Ferro ang paghimog epektibong taming nga moprotehir sa katawhan batok sa mga risgong giatubang diha sa pagpabalik unya sa PUJ drivers.

Ug sama kabugnaw sa sulog sa sapa, humok mipaanod-uyon si Labella sa maong sugyot.

Adunay miingon, nga si Labella dili lig-on mobarog sa iyang kaugalingong hukom. Dali rang mabawog kon may wala’g tuong reaksyon nga mouyog niini. Hinungdan, usahay mahiktan.

Madiktahan! Ug makomentariyohan sa mga kritiko, nga sama kuno sa lusay, dali rang tuyatuyaon sa mga balod.

Alang nako, kining pag-uyon ni Labella sa sugyot ni Ferro nagtimaan lang nga usa siya ka good team player. Kaantigo mopasa o modawat sa bola aron ang team magmadaugon.

Ning pagpugong sa IATF sa ‘go signal’ ni Labella, medyo madelatar ang pagpabalik sa mga traditional PUJ. Ang mga kagangkagang o karaan na, segurado, dili na tugotan.

Dili tanang drayber makabalik. Kadto rang may maayong rekord ang hatagag prayoridad samtang ang mga badlongon, i-junk!

Nindot usab unta nga tangtangon ang mga dagkong bus de pasaheroan nga nagdagan ning daginotong dalan sa siyudad, gawas sa mga bag-o, modernong e-jeep.

Buwahan, momenus ang mga dugoong disgrasya nga maoy makasamot paghuot sa trapiko nga huot nang daan.

IATF
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with