Bisan pa sa pandemiya sa Covid-19, padayunon gihapon ang pagpahigayon sa nabantog nga Sinulog sa Sugbo. Apan sa binag-o ng paagi. Inay nga pisikal nga moanhi sa Dakbayan sa Sugbo ang mga contingents nga buot mosalmot sa presentasyon, ipaagi nalang kini sa virtual showdown.
Kay adto raman nila sayawon sa ilang tagsa-tagsa ka mga dapit ang ilang Sinulog. Pagatawgon kini nga Sinulog 2021 Grand Showdown ug giingong ubay-ubay na ka international contingents ang nagtinguha nga mosalmot sama sa grupo gikan sa Portugal,ug ang laing grupo nga nagikan sa Amerika.
Magtigi gihapon ang Sinulog sa dakbayan gikan sa nagkadaiyang barangay sa siyudad apan limitado lang gidaghanon sa dancers, gagmay ang props ug way mananan-aw.
Anaa gihapoy Sinulog Idol ug puppeteers.
Posibleng sa South Road Properties o sa Cebu City Sports Center pagahimoon ang grand show down. Menus kaayo kini og gastos para sa mga mosalmot sanglit di na kinahanglan mamelete pa ug mobayad sa mga kargamentong props nga dad-on dinhi ang mga contingents.
Ang ilaha lang nga mapakita nila pinaagi sa virtual presentation ang ilang giandam nga sayaw ug musika. Pinalahi kini nga timpla sa kasadya sanglit naa pay pandemiya nga hulga sa tanan.
Kung tan-awon sa dili mga Sugboanon o kadtong wala mag debosyon o kalingawan ray tuyo matag Pista sa Senyor Sto. Niño, nagkapoy-kapoy lang kini nga mga kalihokan kay kuwang sa kasadya.
Apan dinhi masukod kun tiunay ba gyud ang paghalad sa mga mosalmot. Nga bisan di sila pisikal nga makaanhi sa kinapusoran sa debosyon ngadto sa Balaang Bata nga dinhi lang sa Sugbo mahitabo, tim-os gihapon ang ilang pagsayaw ug paghalad pinaagi sa pag-Sinulog.
Ang mahinungdanon sa tanan, mapakita sa mga tumutuo sa Balaang Bata nga bisan paman aning kahadlok, kabalaka, kahingawa ug kagul-anan lig-on ang pagsalig sa mga tawo ngadto sa Kaniya. Nga bisan ang Covid-19 dili makapatalaw kanila pagbuhat sa ilang panaad, ang pag-debosyon kang Senyor Sto. Niño. Pandemiya ka lang, Senyor Sto. Niño ni.