Asa ang presidente dihang niigo ang super typhoon Rolly? Kini ang gibato sa mga kritiko batok kang Presidente Rodrigo Duterte kay kuno wala mopatim-aw sa pag-igo sa katalagman.
Pastilan dili man seguro kinahanglan nga mopatunga ang pangulo aron pangunayan gyud pag-atraka ang bagyo. Unsa siya superhuman nga makig face-to-face gyud sa supertyphoon?
Wala man seguro siya mopakita tungod kay tua man siya sa Davao miduaw sa iyang mga mahal sa kinabuhi atol sa kalagkalag. Pero seguradong mipagawas siya og kamandoan sa iyang ginsakpan pag atiman sa mga naapektohan sa katalagman.
Sakto si Duterte nga gipalurang una niya ang bagyo ayha mibalik sa kaulohan kay sa magdali dali gyud siya og lupad aron ingnon nga siya ang nangamot sa pagsalbar sa mga tawo.
Realistic lang unta kita nga motimbangtimbang sa tinuod nga panghitabo nga walay si bisan kinsang maayong lider nga makasungasong sa bagyo kay tawo ra man usab.
Mabaw lagi ni nga argumento alang pud sa mabaw nga panglantaw ilabi na sa mga kritiko nga nangita lang og buslot aron naay ikasaway.
Dili man perpekto ang response sa kagamhanan apan sa tinuod lang nakahimo man usab sila sa ilang tahas.
Kadtong mga nanaway sa pangulo asa man sila atol sa paghapak sa bagyong Rolly? Midupa ba sila aron babagan ang pagtugpq sa super typhoon?
Maayo lang manaway pero walay agi, mas maayo pa nga motabang nalang inay sa sige og panaway.
Karon ipakita nato ang panaghiusa sa katawhan aron dali nga makabangon gikan sa katalagman.
Ipadaplin ang mga pamolitika kon aduna man ug motutok sa pagtabang sa mga nanginahanglan.