Gibidli ang presidente

Dili manghilabot ang presidente niining pag-ilogay ni Pedro (Alan Peter) ug sa “ginoo” (Lord Allan) sa pagka-speaker sa Kamara, kay mitagam na kuno siya. Ang mahinungdanon lang sa presidente nga mapasar na ang 2021 budget.  Gibidlî man gani ang presidente sa panghitabo sa Kamara, unsa na kaha ang katawhan nga angay unta nila’ng alagaran?  Nahinumdom ko sa akong apohan nga kon samokan na sa pagpunay’g away sa iyang mga apo, modayon pag-ingon, “Kaayo ra ninyo isulod sa sako, dayon bitayon ug paasohan, mapuslan pa mo”.  Wagtang ang bidlî!

Pildi ang maglagot

Sa may kalambigitang balita, napugos na gayod pagbuhi si Kongresman Cayetano sa iyang pwesto isip speaker sa Kamara, ug napulihan na siya ni Kongresman Velasco.  Misuway pa unta si Cayetano ug uban’g kaalyado pagsabotahe sa proklamasyon ni Velasco pinaagi sa pagsira sa mga ganghaan paingon sa plenary hall. Mibahad pa siya ni Velasco nga dili siya makatugot nga “sunogon” sa naulahi ang Kamara. Ni’ng kaparutan ni Cayetano, angayan niyang tamdon ang gisulti ni Adolf Hitler nga, “Kon modaug ka, dili na kinahanglan mo-esplikar; apan kon mapilde ka, pahawa dayon aron dili ka maka-esplikar. Pildi’ng maglagot!

Luwas ang nasud

Temporaryo nga giundang unâ sa Johnson & Johnson’s ang gipahigayon nga clinical study sa COVID-19 vaccine kay imbestigahon pa kon may labot ba ang ilang bakuna sa “dili masabot nga balatian” nga gibati sa mga nisalmot sa pagtoon.  Ni’ng kalamboan, mikuyanap gilayon ang sugyot nga unahon ang mga politiko pagdapat sa bakuna sa COVID-19. Kay matud pa, kon mamaayo ang mga politiko, luwas ug epektibo ang bakuna alang sa katawhan; apan kon adunay bati-on nga side effects ang mga politiko, luwas usab ang nasud nga Pilipinas. Hala no!

Awahi’g US’ka Tikang

Matud ni Defense Secretary Lorenzana, andam ang atong mga mananagat nga bansayon ug hugpongon aron mahimong maritime militia nga motabang pagprotektar sa atong kadagatan ug pag-alkontra sa mga paramilitary nga mananagat sa China diha sa West Philippine Sea.  Dugay na nga nagpakatap ug militia ang China hinungdan nga nailog nila ang ubang isla sa WPS. Kita pa’y nangopya, dugay pa gyud ta molihok.  Haum kanato ang pagya nga, “Walay mopugong kon mangopya ka sa uban, apan hibaw-i nga awahi ka kanunay’g usa ka tikang sa imong gikopyahan”.  Saoonz!

Nalingaw ang DepEd

Usa ka non-government group naglaraw’ng pasakaan ug kaso’ng kriminal ug administratiba ang Kalihim ug uban’g opisyales sa DepEd tungod sa ilang kapakyas sa paghikutar sa mga bansiwag nga sayop sa mga learning modules.  Dili tinuod makapahimuot kini’ng maong sayop labi na kay nakasinati na ang publiko sa susamang kapalpakan sa DepEd mahitungod sa mga libro nga gipanghatag kanhi.  Dako ba kaha’ng kalingawan sa DepEd ang masayop mao nga dili mahimo nga ka-usa lang buhaton. Madahaan!