^

Taphaw nga solusyon

LINTUNGANAY - Fred Languido (Banat) - October 8, 2020 - 12:00am

Gipahibawo sa kapolisan dunay labing minus 30 ka mga high-profile nga priso sa Cebu City Jail ang gipanid-an tungod sa ilang kalambigitan sa negosyo sa drugas.

Ang ilang mga pangalan kanunay nga motumaw nga maoy tinubdan sa drugas sa mga nadakpan atol sa mga operasyon sa kapolisan ug Philippine Drug Enforcement Agency (PDEA).

Sagad nga linya sa mga madakpan dihang sukit-sukiton diin gikan ang ilang gibaligya nga drugas mao nga, gikan ni sa ilang kontak sa City Jail. Nganong nakapadayon sila sa illegal nga negosyo bisan kun tua na sulod sa prisohan?

Kini tungod kay duna silay network sa gawas nga maoy magamit sa operasyon. Ang gikinahanglan lang nila mao ang kahimanan sa kumunikasyon aron magpadayon ang operasyon sa gawas bisan sila nabilanggo.

Ug padayong nilipang ang problema  sa drugas bisan pa og tua na sa prisohan ang mga nagpadagan sa illegal nga negosyo tungod sa mga kurakot nga mga opisyal ug kawani sa mga bilanggoan.

Atol sa hiniusang press conference sa kapolisan, PDEA, ug Bureaue of Jail Management and Penology (BJMP) ilang gisugyot ang pagbutang og mga signal jammer sa prisohan aron kuno malikayan nga makatawag sa telepono ang mga nalambigit sa patigayon sa drugas.

Kun way signal sa cellphone dili na makahimo sa ilang mga transaksiyon ang maong mga durugista. Mao ni problema sa atong kampanya batok sa illegal drugas tungod kay sayop ang mga paagi nga atong buhaton pagsulbad sa problema.

Dili signal jammer  maoy solusyon sa problema kun dili ang paglimpiyo sa mga prisohan gikan sa kurakot nga mga kawani ug opisyal. Dili ba hugot man nga gidili ang cellphone sa mga priso, nganong duna may cellphone sulod sa prisohan?

Kini maoy unang pangutana nga angayang tubagon sa kadagkoan sa prisohan. Dili sab ko motuo nga nakalusot ni pinaagi sa mga miduaw sa prisohan nga wala mabantayi sa gwardiya tungod kay labihan man nilang ka istrikto.

Gani bisan ang kinatawo  sa babaye apil man sa ilang susihon pagsiguro nga way gisipitan nga illegal sa dili pa makasulod sa prisohan. Kun labihan ka istrikto sa mga gwardiya sa buot mobisita, usa ray buot ipasabot niini.

Ang mga kontrabando sulod  sa prisohan sama sa drugas, cellphone, ug uban pa dili sulagma nga nakalusot sa mga gwardiya. Gipalusot o ba kaha sila mismo maoy nagpalusot niini. Dili kaha  nga gihimo ning negosyo sa mga kawani  ug opisyal sa prisohan?

Kini maoy unang angayan nilang sulbaron inay nga mogasto na sab ang gobyerno alang sa signal jammer.

Ang pagbutang og signal jammer usa lang ka matang sa pakonswelo aron linglahon ang publiko ug patuohoon nga duna silay gihimo pagsulbad kunohay sa problema. Wala ni kalainan sa ilang pasiatab nga gipanid-an ang 30 ka mga priso nga kuno nalambigit sa drugas. Taphaw ug tataw nga ulog-ulog sa publiko ang maong pamahayag.

Kun tinud-anay nga seryoso ang mga awtoridad pagsulbad sa problema sa drugas sulod sa mga bilanggoan nganong kinahanglan nilang i-anunsiyo sa publiko nga dunay 30 ka piniriso nga ilang gipanid-an?

Kinsa bay buang nga mopahibawo nga sila naniid kun tinuod gyud silang seryoso nga masulbad ang problema?

SOLUSYON
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with