Sa katapusan ang husay

OKTUBRE 4, 2020:  Ikakawha'ag-Pito

nga Domingo sulod sa tuig

Mga Pagbasa: Is. 5;1-7/Sal. 80/

Fil. 4;6-9/Mt. 21;33-43

Niadtong nagtungha pa ko sa elementarya, kaming mga bata kaniadto ang makahimo sa pagkwenta sa among general average. Tawgon mi sa titser ug padad-on papel diin himoon niya ang pag-enumerate sa mga grado namo. Human namo og total moingon dayon siya nga igo ra kuno siyang ni-record sa among grado kami kuno ang nihimo. Ug nidugang siya nga kun unsay gitanom mao sab ang anihon labina na sa kaulahian kay anaa man sa ulahi ang pagmahay ug pagpaningil. Sa laktod mangayo gyud siya og husay.

Ang atong ebanghelyo karong Dominggoha kun buot hunahunaon nagpadayag kun unsa kamapailubon gyud unta sa Dios. Gipadala niya ang mga propeta aron motudlo sa katawhan pagbalik ngadto sa kaniya. Dili pa gyud paigo iyang gipadala ang iyang bugtong anak aron sa ingon maoy mopadayag sa kinatibuk-ang gugma gikan kaniya. Apan ang mga tawo nagmagahi gyud sa hingpit. Ang maong pagmagahi ni resulta sa pagpamatay sa mga propeta ingon man ang kamatayon mismo sa pinalanggang anak sa Dios nga atong Ginoo. Gipatay siya ug gilansang sa krus mismo sa katawhan nga nagsangpit sa iyang Amahan nga ilang Amahan.

Ang kinabuhi mubo ra gyud. Kay mubo ra man unta tarungon nato sa pagdala aron sa ingon mamahimo  kining magmabungahon. Ang bunga nga atong mahatag mao man ang bunga sa maayong binuhatan. Binuhatan nga inig abot sa tukmang panahon sa Dios kita paninglan. Kun makatarunganon ang atong pagpuyo nan, anaa ang kinabuhing dayon apan kun dautan, anaa ang silot sa hudno nga nagdilaab.

Apan labaw sa tanan, dili kini mahitungod lang sa impiyerno o langit. Mahitungod kini sa atong dakong gugma ngadto sa Dios nga mihatag sa iyang dakong gugma ngari kanato. Angayan lamang nga ang iyang gugma baslan nato og gugma ingon man pagkamatinud-anon kay diha lamang sa pagbuhat sa ingon dili kita bation og dakong kahadlok nga mamahimong pagahukman sa kahitas-an sanglit nahimo man nato kun unsay maayo ug makaayo sa kadaghanan. Ug dugang pa niini, pasalamat kita nga tungod sa gugmang Diosnon padayon siyang nagpadala kanato og mga tawo nga molihok aron pagmatnala sa maayong balita. Nagkinahanglan kita og mga Balaang mga Apostoles nga kanato moalima ingon nga katawhan sa Dios. Sa panahon sa pagpaningil sa ani sila ang magtabang kanato padulong sa Ginghariang Langitnon. Pagbinuotan lang ug ang tanan maayo ra alang kanatong tanan.