Nganong dunay eksperto?
Nagkaubos na ang kaso sa COVID-19 apan ang mga sakop sa UP-OCTA Research Team mipasidaan nga risgo pa kaayo ang sayo nga pagpaubos sa quarantine status labi na sa Metro Manila. “Eksperto” ang gihingalan sa mga sakop sa maong OCTA Research Team. Apan pamulong pa sa akong pilosopong silingan, “Bag-o pa ang COVID-19, nagsige pa’g tu-on ang mga doktor sa maong sakit, daghan pa ang gidili aron malikayan ang sakit, labaw sa tanan, wala pa gani bakuna kay gitun-an pa, UNYA NGANO’NG ADUNA NA MA’Y NAGPAHINGALAN NGA SILA EKSPERTO?” Baya no!
Basolon aron daygon
Matud ni Bise Presidente Leni Robredo hayan nahatag ang tanang pundo alang sa ayuda sa katawhan kon gigamit pa sa DSWD ang “Listahan” kon database sa National Household Targeting System (NHTS) for Poverty Reduction. Wala baya malilong nga sa sinugdanan pa lang nagkagubot na ang pagpanghatag sa ayuda, apan walay mga sugyot sa pagpahapsay niini nga gidason ang Bise Presidente. Tinuod gayod diay ang panultihon nga “Ang panan-aw sa tawo sa nangagi, tataw ug tin-aw kaayo nga daw gamit ang linte”. Basol pa more!
Walay ulihan ang konsumidor
Magsugod na pagpamutol sa electric connections and VECO karong Oktobre 1 alang niadtong mga account nga adunay nagtangag nga bayronon nga duha ka bulan. Sukad pa niadtong Agosto gipahigayon sa VECO ang pagpamutol apan tungod sa pagpahamtang pagbalik sa ECQ sa ubang lugar, naundang ang maong kalihukan. Dako kining suliran sa mga konsumidor nga daw gipapili tali sa “devil” o sa “deep blue sea.” Mopili ka ba sa “dakong lawod” nga gihinganlan ug ECQ, o ari ka ba sa “panuway” nga gihinganlan ug VECO. Fezteleern!
Kulang sa bokabularyo
Mipasidaan ang PDEA ngadto sa mga masalaypon nga mga barangay kapitan nga mahimo sila’ng maapil sa “Oplan Tokhang” kon padayon sila’ng magpabaya sa pag-implementar sa kampanya batok sa ilegal nga druga. Daw nag-usik lang sa laway ang PDEA kay sayod na man kita nga dili madutlan og hulga ang mga nalambigit sa maong delihensya sa druga. Matud pa bitaw sa panultihon, “Ang pagpanghulga mao lamang ang mahimo sa mga tawo nga kulang ang bokabularyo”. Storyaheee!
Hadlok mapulihan
Miproponer si Pampanga Representative Juan Miguel Arroyo ngadto sa Comelec sa pag-oktaba sa 2022 eleksyon sa rason nga dili gayod mobotar ang katawhan kay mahadlok matakdan sa coronavirus. Apan gisalindot sa Malacañang ang maong ahwag sa kongresista. Nangalisbo sa kalang-og ang maong sugyot. Naghimo mn gani ug lagda ang gobyerno tungod kay lisod badlongon ang magtapok nga katawhan. Tataw kaayo nga ni’ng maong awhag sa mga politiko, sila ang nahadlok nga mapulihan sa katungdanan. Pagka-ipokrito na man gyud!
- Latest