Usa ka dakong kalamboan kaning pamahayag ni Pres. Duterte nga dili mahimong matuis o maangkon ni bisan kinsa ang teritoryo sa Pilipinas.
Ang iyang pamahayag maoy labing unang klaro niyang gibuhian bahin sa isyu sa West Philippine Sea. Bug-at kini nga pamahayag tungod kay sa United Nations niya kini gipadayag nga gisaksihan sa ubang mga lider sa mga kanasuran.
Tingali mao pa sab kini ang labing una nga higayon nga gidasonan ni Duterte ang hukom sa 2016 Arbitral Tribunal nga miingong imbalido ang pangangkon sa China sa tibuok South China Sea diin nasakop ang WPS.
Sa nanglabay nga mga katuigan sa paglingkod ni Duterte iyang gipadaplin ang maong desisyon bugti sa pakigsuod og relasyon ngadto sa China nga misaad kaniyang mobubo og mga imprastraktura nga mohaom sa iyang build, build program.
Senyales na ba kini nga hinayhinayan na ni Duterte pagabog sa China o lain na sab niya kining taktika aron modugo ang maong nasud pagtuman sa ilang mga gisaad nga kalamboan? Makita lang kini kun ang mga pulong suportahan og aksyon.
Bisan unsa pay tumong ni Duterte sa iyang pamahayag, siguradong di kini ikahimuot sa China. Naghatag sab kini og kadasig sa ubang mga nasud nga wala mahimuot sa ilegal nga pagpangilog sa China og mga teritoryo sa mga silingang nasud.
Tungod kay kaya rang dat-ogan o wahingon sa China ang mga silingan niini tungod sa iyang gidak-on ug kwarta. Bugtong makapakgang kaniya mao ang Amerika ug mga kaalyado niining mga nasud.
Sa nakalabay nga mga adlaw, ang Pilipinas ug ang India nagpinirmahay og open trade agreement. Makaayo kini sa duha ilabi na sa Pilipinas.
Ang India ug Pilipinas pareho og kasinatian sa mga kamot sa China. Kun kita dunay WPS nga giangkon ug gibalayan na sa China, ang Indian Ladakh region gihinayhinayan sab og ilog sa China. Ang kalainan lang sa Pilipinas wa kitay militar nga sama kadako ug kakusog sa India. Apan ang estratehikong lokasyon sa Pilipinas sa kadagatan sa Pasipiko makapapiang sa ambisyon sa China kun gamiton kini pabor sa interes sa mga Pilipino.