Sukwahi apan tukma
LINTUNGANAY - Fred P. Languido (Banat) - September 13, 2020 - 12:00am

Sukwahi man sa naandan ug kultura ang pagsirado sa mga sam-ang panahon sa "kalag-kalag" apan mao ni ang labing angayang buhaton sa atong gobyerno aron malikayan ang pagkuyanap sa COVID-19.

Tinagali, mao ni unang higayon alang sa kadaghanan nato nga makasinati niini.

Sukad ko nakamatngon og buot nahimo na nga kinaiya sa mga tawo ang pagduaw sa lubong sa mga pinangga nila sa kinabuhi nga unang mitaliwan sa laing kalibutan.

Tradisyon na sa kadaghanan ang pagtigom sa pamilya diha sa mga lubnganan aron ikauban ang ilang mga namingawan nga sakop sa banay.

Sadya ang mga menteryo panahon sa Nobyembre 1 ug 2. Apan tungod sa COVID-19 dili na kini nato mahimong buhaton karong tuiga.

Si Mayor Edgardo Labella sa dakbayan sa Sugbo miluwat na og Executive Order nga magpasirado sa tanang sam-ang dinhi sa dakbayan gikan sa Oktubre 31 hangtud sa Nobyembre 2.

Gikinahanglang protehian ang atong nasugdan sa kampanya pagpugong sa pagkatap sa COVID-19 sa niaging pito na ka buwan.

Atong nasaksihan unsa ang nahimong epekto sa pandemya sa atong tagsa-tagsa ka mga kinabuhi ug sa ekonomiya sa nasud ug sa tibuok kalibutan.

Kun dili ta mag-amping ug maoy ipatigbabaw ang pagsunod sa kultura ug naandan, dako ang posibilidad nga mobalik pagsaka ang mga kaso sa COVID.

Busa sakripisyo sa matag-usa ang gikinahanglan aron hingpit nato nga mabuntog ang kaaway.

Atong lauman ug saligan nga mabalik ra ang naandan ta nga pagkinabuhi human niining krisis.

Apan kining tanan mag-agad sa atong kooperasyon sa gobyerno.

* * *

Naguol hinuon ko niining bag-ong lakang sa Inter-Agency Task Force nga tugotan na ang inanay nga pagpausbaw sa gidaghanon sa mga pasahero nga mahimong ikarga sa mga pampublikong transportasyon.

Sugod karong semanaha us-usan ang gintang sa matagpasahero diha sa public transport.

Sa ato pa itugot na nila ang mas sikit nga paglingkod sa mga pasahero hangtud nga wa nay social distancing.

Ambot og gitun-an ba ni og maayo sa IATF. Nahadlok ko nga mausik ang tanan natong paningkamot niini.

COVID-19
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with