Basin kita'y bisitahon
BALITAHOM - Atty. Jose Marie N. Poblete (Banat) - September 13, 2020 - 12:00am

Mipagawas na og Executive Order si Mayor Edgar Labella alang sa temporaryo’ng pagsira sa mga publiko ug pribadong sementeryo sa dakbayan sa Sugbo sugod Oktobre 30 hangtud sa Nobiyembre 3.  Gitumong kini aron malikayan ang panagtapok sa katawhan.  Apan gitugotan gihapon ang paglubong ug pagcremate sa mga minatay atol sa maong mga adlaw.  Maayo gani kay adunay exemption. Kuyaw man gud nga kon dili nato mabisita ang atong mga mitaliwan sa adlaw nga gigahin gayod kanila, basin sila na hinoon unya ang mobisita sa atong panimalay. Hala no!

Nag-iyahay’g pamugsay

Milusad ang buhatan ni Bise Presidente Robredo og usa ka “free job posting platform” aron kuno matabangan ang minilyon ka mga Pinoy nga nawagtangan og trabaho atol sa pandemic.  Maanindot unta kini nga balita apan kon imong tan-awon pag-ayo, daw nag-iya-iya ug nagpalabwanay ra man ang administrasyon ug oposisyon sa pagdani sa pagbati sa katawhan. Inay maghiusa, nagbinagsa na man hinuon.  Sama ra sila sa duha ka buta nga tungod kay nag-atubangay pagbugsay sa ilang gisakyan nga sakayan, wala na gyud hinoon mouswag, hinooa nagtuyok-tuyok lang ang ilang gisakyan. Pagkatoytoy!

Sikit-sikit, dili uyab

Ubay-ubay na unya nga mga pasahero sa Metro Manila ang makasakay sa matag biyahe sa mga train ug ubang PUVs nunot sa laraw sa kagamhanan nga lugakan na ang lagda sa social distancing sa mga publikong transportasyon.  Gikan sa naandan’g usa ka metro, mahimong moabot na lang unya ngadto sa usa ka piye ang distansya sa matag pasahero. Maayo kini nga balita alang sa mga sumasakay lakip na kadtong mga way uyab kay makasinati na usab sila sa gilarawan sa kanhiay nga pagya nga nag-ingon, “SSDU – Sikit-sikit, Dili Uyab”.  Hayahaya man!

Pagoryo-goryo pa more

Wa magmalampuson ang gipahigayon nga “online national simultaneous earthquake drill” nga gipasiugdahan sa NDRRMC tungod sa giingon nga technical glitch gumikan sa hinay nga internet. Dili ba ang mga pagtay-og ingon man ang epekto sa linog lokal man nga kasinatian? Busa mas maayo tingale nga lokal usab, ug dili nasyonal, ang himoon nga mga pagbansay-bansay.  Kahibalo na nga problema ang internet, mosalida gihapon. Unya magpagoryo-goryo ngano napakyas. Kalas ug bugô ang pandemic. Fezteleern!

Lupig ang nurse sa kargador

Nanawagan ang pundok nga ginganlan og Filipino Nurses United (FNU) alang sa pagpa-usbaw sa suholan sa mga nurse sa pribadong mga tambalanan. Dugang pa sa FNU, nga sa kamariyot sa sweldo, dili na sila hapit makasugakod sa inadlaw-adlaw nga pagpanginabuhi. Subô palandungon apan tungod sa kahakog sa tawo, daw wala kini kasulbaran. Dako pa tingale’g kita ang mga kargador sa Carbon kon itandi sa sweldo sa uban’g mga nurse. Dili na diay kaseguroan sa maayong kaugmaon ang edukasyon. Mora’g sakto ang uban nga miingon nga, “Way nadato sa eskwela”. Ambot na lang!

EDGAR LABELLA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with