Ipadayon ang pag-amping

Mas lugak na ang quarantine status sa dakbayan sa Sugbo sa tibuok buwan sa Septembre.

Kini human gipaubos na sa Inter-Agency Task Force (IATF) ang tibuok Sugbo sa modified enhanced community quarantine.

Ubos sa lagda sa IATF mas daghang balay patigayon ang tugotan na nga mangabli ug ang public transportation mas daghan nang mobiyahe.

Hinuon gihatagan og gahom sa IATF ang lokal nga mga opisyal paghimo og kaugalingon nga mga lagda depende sa sitwasyon ug panginahanglan sa ilang dapit.

Kini maoy hinungdan nga bisan MGCQ na ang dakbayan sa Sugbo dili gihapon makagawas kun way quarantine pass.

Magpabilin sab nga kontrolado ang public transportation tungod kay way public utility jeepney nga tugotan nga makabiyahe pagbalik gawas sa mga moderno.

Daghan ang nagbagulbol nganong kinahanglanon pa gihapon ang quarantine pass bisan MGCQ na ang status sa dakbayan sa Sugbo.

Alang nila way kapuslanan nga mangabli og balik ang mga patigayon kun way customer tungod kay limitado man ang quarantine pass nga giisyu sa dakbayan.

Ilang argumento mao nga ang pagpaubos sa quarantine status gitumong aron pagbuhi sa himatyon na nga ekonomiya.

Nakasabot ko sa ilang argumento apan husto ang kagamhanan sa dakbayan nga limitahan gihapon ang kalihukan sa publiko.

Ang pagpaubos sa quarantine status wala magpasabot nga hingpit na natong nabuntog ang kagaw sa COVID-19.

Atong hinumduman nga duna pa gihapoy kaso sa COVID-19 dinhi sa dakbayan. Gani basi sa talaan sa Department of Health, kapin pa sa 600 ang atong active cases.

Kun magpasagad ang kagamhanan ug tugotan ang publiko nga magpatuyang sa ilang gibati mas dako ang piligro nga mosulbong og balik ang atong kaso.

Atong kuhaan og pagtulon-an ang nahitabo sa kaulohan nga misulbong og balik ang ilang mga kaso.

Atong lugwayan og dyutay ang atong pag-antos hangtud nga mahingpit ang atong kadaugan batok sa COVID-19.

Kawang ang sakripisyo nga atong gihimo sa milabay’ng unom na ka buwan kun magpabaya ang matag-usa kanato.

Atong padayonon ang pag-amping ug pagsunod sa mga lagda.