Karong namiya na gikan sa dakbayan sa Sugbo ang kapin usa ka libong mga polis gikan sa nagkalain-laing kalungsoran, probinsya ug rehiyon nga nitabang pagbantay dinhi, siguradong maglisod ang kasamtangang pwersa sa kapolisan sa siyudad nga mapadayon ang pagpasunod sa health protocols sama sa nangaging mga buwan. Ang maong mga polis kutob lang niining semanaha sa siyudad ug kinahanglan na silang papaulion didto sa ilang mga lugar, samtang ang mopadayon sa pagbantay mao nalang ang local nga kapolisan sa siyudad.
Apan siguradong dili na mahimo pa nila ang sama kahigpit sa pagbantay sanglit kinahanglan man sab sa Cebu City Police Office nga motrabaho sama sa naandan, ang pagbantay batok sa mga krimen, pagsulbad sa mga kaso ug pagpatuman sa balaod.
Tungod niini, mabiyaan gyud ang pagtutok sa pagpatuman sa minimum health protocols nga maoy ilang gitutokan sa panahon nga grabe pa kaayo ang mga kaso sa COVID-19 sa siyudad.
Dinhing dapita na magamit ang mga barangay tanod. Ilaha mang gyung trabaho ang pag-abag sa kapolisan ilabi na kun kuwang ang mga polis aron mapaigo sa tanan.
Usa pa, mas bentaha sila kay nasuhito sila sa ilang mga barangay ug nakaila sila sa mga tawo kinsay tinud-anay nga mga badlungon ug kadtong mga tarong.
Apan pasidaan lang, kinahanglan silang mosubay sa balaod ug dili moabusar sa tanang oras. Ug usa sa hinungdan nganong duna kanila moabusar sa gahom ug maghawod-hawod sa ilang barangay mao ang kakuwang nila sa training kun unsay hustong pamaagi pinasubay sa balaod.
Dunay uban magdala-dala og armas bisan dili lisensiyado. Duna say mga kapitan nga mokuha og tanod tungod lang kay sila isog ug dili mahadlok. Mao nga dunay uban moabusar tungod kay nahubog sa gahom nga dili unta angay isalig kanila.
Aron dili magkaproblema, kinahanglan gyud silang ipaubos sa pagbansay-bansay aron masayod sila sa ilang limitasyon ug kung hangtud asa gitugot sa balaod ug masabtan nila kun unsa ilang kaakohan sa katilingban. Ning paagiha, mismo ang mga tanod dili makalapas ug mameligrong makasohan, ug labaw sa tanan walay mga residenteng mabiktima sa pagpangabuso.