Ayaw panghuraw

Dunay mga tawo kusog kaayong mohuraw sa ilang isig kaingon. Kini tungod kay bugtong paagi kini sa pagtabon sa ilang mahuyang nga pagkatawo.

Kining maong kahuyangan maoy nagdapit kanila sa paghimo og mga butang nga makapa intimidate sa uban.

Dunay mogawas nga isog sila apan diay taslakan. Kini tungod kay wala nila mahupti ang tinud-anay nga kahulogan sa gitawag nilang baruganan.

O dili ba kaha dunay nagpunay og sugnod aron mahaling ang kalayo sa kasilag.

Sa atong pagdayon sa panaw sa kinabuhi dili tanang mga komentaryo atong paminawon labina kun sa tan-aw nato dili gyud tawon makatabang.

Sa laktod nga pagkasulti dili tanang mga tawo nga nia sa atong palibot mahimong saligan sanglit ang uban kanila mamahimong mas lala pa kay sa bitin nga manunukob.

Tinuod dunay mga higayon nga bation nato ang kahadlok ug kasubo tungod  kay dunay mga tawo nga giisip natong duol ug mahal kaayo nato apan sila mopahilayo.

Mopahilayo tungod kay dili na mahimong dugtongon pa ang bisan unsang kalambigitan tali sa duruha ka mga habig sa kapasikaran nga managlahi ang atong baruganan.

Sama ni Jesus nga wala tuohi mismo sa iyang kaugalingong mga katagilungsod sa bugtong rason nga siya anak lamang sa panday nga si Jose.

Ang kawalay pagtuo nila maoy nagtukmod kaniya sa paghimo sa paglikay sa paghimo og mga milagro niadtong dapita.

Bisan pa man kun gihuraw ug gilutos sa makadaghan ang atong Ginoo apan nagpabilin gihapon siyang makanunayon diha sa paghimo og maayo.

Apil pud niini ang pagsangyaw sa maayong balita ngadto sa mga kabus, ang pag-ayo sa mga masakiton tungod kay si Jesus kombinsido man sa iyang tahas ug baruganan ingon nga dinihogan.

Sa matag higayon nga ikaw hurawon ayaw kahadlok. Mahimong di ka mangita og away apan ayaw pud og patamaka sa imong katungod.