Niay kulokabildo sa duha ka host sa usa ka commentary program sa radyo, sa wala pa ang pademic: “Bai, komusta’s Elmer? (dili tinuod nga ngalan. Dugay na man ming wa magkita!” “ Wa na Bai, luya na kaayo, kapin nas 70 ang edad, ug tua na lang sa ilang balay nagpuyo, wa nay lakaw-lakaw.”
“Mao ba? Duna man lagi koy amigo nga baskog pa kaayo, mga 80 na ang edad”
Tinuod tingali nang giingon nga ang katigulangon ania ra sa atong hunahuna. Only in the mind. Ania ra atong hunahuna, nga kon magpunay kitag hunahuna nga tiguwang na ta, tiguwang na gyud ta, mosamot pag katigulang.
Sa ato nang gibalikbaik dinhi, si George Burns nagkanayon: “Growing old is inevitable.” Sa ato pa, dili kalikayan ang pagkatigulang, gawas kon sayuon kag roll call sa Ginoo. Kitang tanan, adto gayud padulong sa pagkatigulang.
Sumpay ni George Burns: “But being old is not.” Sa ato pa, despite sa hinog natong panuigon, dili kinahanglan nga tiniguwang kita, sama sa nahitabo ni Elmer nga did not refuse to grow old. Nisugot siyang matiguwang.
Padayon ni George: “Sure you will grow old, but you can stay young - young in looks, young in thinking, and young at heart.”
Mahimo kaayo ni nato, basta di lang ta magpadaug sa atong edad.
Tan-awa nga daghang kaayong mga senior citizen nga bata pang tan-awon. Mga guwapa ug mga guwapo lang gihapon. Unya batan-on ang mga panghunahuna, ug labaw sa tanan, bata pa ang mga pagbati, kusog pang mopitik ang kasingkasing, ilabinag makakitag magkiay-kiay nga binuhat.
Tambag ni Burns. Ato nausab kining nahisgutan sa unang mga lindog. Ganahan kaayo kog magbalikbalik niini. Ania:
“Simply refuse to grow old. Be determine to fight it all the way.” Fight gyud ! Unsaon? Wake up happy. Stay healthy (ayaw abusahi ang imong lawas). Avid undue stress. Spread joy. Count your blessings. Share your treasure (kini, medyo lisud ni, ilabinag pinaspasan ang imong treasure). Keep up with the times (ayaw pagkinaraan).
“Be fascinating. Be creative. Be well informed (basa kanunay sa Banat News ug sa The Freeman).
Grow spiritually (hinumdomi you are both body and soul). Be Bold. Be victorious (Pagmadaugon kanunay). Be wonderful. Live love (likaye ang kasilag, kayugot, ug pagka-matinahapon ngadto sa ubang tawo). Learn. Laugh (bahala nag masaypan ka nga nabuang na) . And most of all, most important of all, be yourself (ayaw awata sila si Koko Martin ug Angel Locsin).
Ug kinsa man kining atong giingon dinhi nga 98 na ang edad nga mo-drive pa? Siya si Dr. Jose Javier sa Quezon City. Kini ang akong nakuykoyan (ni Leo pa) gikan sa daan nakong clipping pinitsahan og Marso 2, 2008 pa. Dugay na, busa wala na kitay kasayoran bahin kaniya karon.
Anyway, matag Domingo siya ang mag-drive sa iyang asawa pagtambong sa alas 5:30 nga Santos nga Misa. Di ba, sa pagpangompra.
Pag-adto niya sa LTO kay magpa-renew sa iyang lisensiya, hapit siya mabalibari tungod sa iyang edad. Apan, tapus makapasar sa usual nga test, na-renew gyud ang iyang lisensiya. Ato ning padayunon paghisgot sa sunod higayon.