Pari mi-ehemplo ni Duterte

‘WHO IS A GOOD LEADER?’ Mao kini ang topic nga giladlad sa pari nga mihimog Spiritual Recollection. Matud niya, “ang maayong leader mao ang: 1) Authority of the group.

Kana bang mosulti siya, tuohan! Naa may tawo nga inig sulti niya, tuohan gyod nato.

Naa say tawo nga bisag unsaon niyag pangugat og istorya, dili gyod tuohan.”

Unya, iyang gihisgotan kadtong 2016 presidential election:

“Kon mosulti gani sila si Roxas, nindot kaayo motabi. Pero ang mga tawo, dili gyod mopakpak. Mora bag…

Pero, inig sulti ni Duterte, minus kaayo ang isulti. Walay daghang…

Igo rang maghapyodhapyod sa nawong ba. ‘Kanang drugas, sayon ra kaayo na. Patya nang mga adik.’ Haskang, mga tawo mopito, uy! Lahi siyag authority.

Kanang iyang tingog naay authority bitaw. Mao na, nga landslide siya.”

Dayon, gipadayon sa pari ang laing lima ka lig-ong kalidad sa abilidad sa tawo, kinsa angayang himoong leader. 2) Head and master of people. 3) Center of unity of the group. 4) Change directions and who represent the group. 5) Who sets directions. 6) Who makes rules.

Ug si Duterte mao gihapoy iyang gihimong ehemplo kay si Duterte anaa kuno niining mga hiyasa.

Nasayod ang pari nga si Duterte dili mahadlok mopatay sa mga dautang elemento. Apan kaantigo maluoy.

Ang pari, mipaambit sa iyang nasaksihan. Niya pa, sa administrasyon ni Pinoy, naghitak sa drugas ang tanang prisohan nga iyang pagaduawon ug adtoan.

Pula ug siga kaayo ang mata sa mga piniriso, pulos haggard look ang panagway timaan nga pulos manuyopay.

Pero pag-abot sa war on drugs ni Duterte, dako kaayo ang kausaban.

Nahinlo ang nawong sa mga adik.

Nahanaw sab ang kanhi grabeng pagpalusotay sa gidiling drugas.

Unya, mibubo pa gyog minilyong kuwarta si Duterte aron patukorag dugang prisohan ang mga dapit, diin naghuot na ang nangabilanggo ug gipadak-an ang daily food budget sa mga priso.

Usab, ang 30-50% nga kaltas sa allotted prisoners’ food budget nga kanhi maoy raket sa mga guwatsinanggo, nahunong na.

Mao kini rason, nganong bisag unsaon pa pagdaut si Duterte sa tanang oposisyonista, ang iyang rating sa SWS pabiling taas kanunay.

Hinuon, giklaro sa pari. Nga kini, base lamang sa personal niyang opinyon.