Pinugsanay bang WeTrace app?
Nanawag ang trabahante nga taga Liloan sa amihanang Sugbo sa tagduma sa iyang gialagarang kompaniya sa Dakbayan sa Sugbo nga may duha ka tuyo:
Una, manghuwam siya og P5,000 alang sa downpayment sa bag-ong motorsiklo nga ipuli sa daan nga nagsige nag ka-aberiya ug aron nga di na matanggong sa dan pagpaabot og pamasaherong kasakyan; ug
Ikaduha, mopalta siya og usa ka adlaw kay kinahanglang moadto sa munisipyo aron sa pagpangunay pagkuha sa iyang work pass kay wa siyay smart phone ug internetaccess ug busa di maka-parehistro online.
* * *
Uban ang pagtugot sa tagduma, naabtan ang kawani og tibuok adlaw sa munisipyo una nakakuha sa iyang pases. Wa pa ganing kasaulog nga di na siya masangit sa checkpoints sa mga utlanan sa Dakbayan sa Sugbo, giingnan siya sa taga munisipyo nga temporaryo ra ang iyang pases.
Gihatagan siya og lugway nga pila lang ka adlaw sa paghimong permanente sa pases pinaagi sa pag-download sa WeTrace app ug pagsumiter sa tanang gikinahanglang mga dokumento pinaagi sa app. OA ba lang ang Liloan o pinugsanay gyod ang paggamit sa app?
* * *
Maong nibalik pagtawag ang trabahante sa iyang tagduma uban ang bag-ong tuyo? Mahimo ba nga ang iyang huwaman nga P5,000 di lang idayon og downpayment sa motorsiklo aron nga iya na lang ipalit og smart phone?
Way makalalis niya. Unsa man tinuod ang kapuslanan sa bag-ong motorsiklo nga di man gihapon siya makatrabaho sa Dakbayan sa Sugbo kay kanselahon man sa munisipyo ang iyang pases kon di dayon siya maka-install sa app?
* * *
Unsa may nahitabo sa nahaunang pasalig sa lokal nga mga opisyal nga di pinugsanay ang app? Nga mahimo rang mokuha og hard copy sa pases gikan sa mga munisipyo ug barangay halls ang mga trabahante nga way smart phones?
Ang app mismo naputos sa daghang reklamo: Kinahanglang magbalikbalik og sumiter sa mga dokumento; sigeng ungot; mosalikway sa aplikasyon nga way katin-awan; mopahibawo nga gihikay nang aplikasyon apan mobakwi pagka sunod adlaw nga wa pay nadawat nga aplikasyon; usik sa baterya; ug kinahanglang di pawngon ang bluetooth ug data aron nga di makanselar ang pases. Kanus-a man sila mohunong sa paglisudlisod sa katawhan?
* * *
- Latest
