Mental wars: Pagpakabuhi ning panahon sa pandemic

Lisod magpakabuhi ning kalibotan nga puno sa kabalaka ug kawalay kasegurohan. Tungod niini, kadaghanan nato ang nahimong nagtinguha na lamang sa grasya sa sayong kamatayon.

Dili tungod kay wala sila sa ilang maayong kabuot kondili tungod kay buot silang moikyas sa gihambing kasakitan. Kining maong kasakitan mao man ang nakapahimong impiyerno sa atong katilingban.

Unsay angay natong himoon aron kita mabuhi ug magpakabuhi ning panahona?

1. Be Creative. Wala kini gipili nga pangedaron mabata man o matiguwang. Mahinungdanon kini nga himoon aron sa ingon dili laay ang imong panaw sa kinabuhi labina ning panahon diin limitado ra gyud ang atong kalihokan. Ang paggamit sa imahinasyon, ang pag-apil-apil sa natad sa arte dako na kaayo og kahimoan aron mas mapadayag mo pa ang imong kaugalingon pinaagi sa imong mga obra.

2. Be Love. Ang gugma maoy naghatag og rason kun nganong kinahanglan kitang magpakabuhi. Kun wala ang gugma walay kapuslanan ang tanan natong panlimbasog. Kun wala ang gugma wala kitay igong padulngan.

Ang gugma maoy nagdapit kanato sa paghimo og maayo. Ang gugma maoy naghimo kanato sa pagpangita og kahulogan sa tanan natong panlimbasog. Sa laktod, ang gugma maoy rason sa atong pagpakabuhi ug ang atong kinabuhi mismo.

3. Think of Your Creator. Ang atong magbubuhat maoy bugtong sukaranan kun nganong nia kita karon. Tinuod limitado kaayo ang atong kinabuhi ug walay igong padulngan ang tanan kun sa atong paningkamot lamang apan samtang anaa pa ang Dios ang tanan mamahimong makahuloganon. Mahimong biyaan kita sa tanan apan ang Dios dili gyud mobiya. Kita iya mang pinangga.

Ning panahon sa pandemiya dili kita magpakawala sa paglaum tungod kay ang paglaum bisan diyotay lang nga dangilag mamahimong makapasiga kini sa tibuok tinapok nga sugnod sa tawhanong kalambigitan.