Unang adlaw sa Agosto, diin gikan sa modifed enhanced community quarantine (MECQ) gipaus-os na ngadto sa general community quarantine (GCQ) ang dakbayan sa Sugbo, naabli ang mga gipangsirad-ang dalan nga gibantayan sa mga polis, military ug volunteers.
Mibaha ang mga sakyanang daw mga pinirisong hayop nga bag-ong nakabuhi, naglumbaanay’g dagan paingon sa nagkalainlaing dapit ug destinasiyon nga dugay nang nabiyaan, unya wala na maadto o maduaw.
Usab, sa mga daplin, nagkaanam kadaghan ang mga tawong nanglakaw. May mipaingon sa trabahoan, mall, terminal ug ubang dapit nga bag-o lang nangabli pag-usab. Timaan, nga ang kadalanan nga kanhi gihigdaan sa kamingaw, karon hinayhinay nang gipukaw sa nagsugod nga mga kisaw.
Sa social media, unang adlaw pa lang sa GCQ, may gi-post nga kuhang video sa mga pasaherong nagdasok-ilogay pagsakay sa bus sa usa ka terminal. Nawala ang kasagrado sa social distancing, Nakaunipormeng mga tigbadlong nawala sab. Busa ang mga gahi, nakapatuyang.
Apan kinahanglan pa ba ang presensiya sa mga mananakop aron ang sibilyan mapugos pagsunod sa balaod? Mahanaw ba diay ang balaod kon walay nagbantay? O, nagpasabot lang kini nga bisan ning panahon nga gihatagan tag kahigayonan sa Ginoo sa pagbinuotan, sa pagsunod sa lagda nga makaayo sa tanan, daghan gihapon ang nagmasinupakon?
Balik sa unang adlaw sa GCQ, adunay 355 kapin ka mga gahi ang nadakpan: walay quarantine pass, wala mag-facemask, wala mosunod sa number coding ug nakalapas sa curfew hours samtang nanggawas sa dalan ug nangadto sa mga malls.
Mao kini ang gikahadlokan sa mga mabinantayong concerned citizen. Kay bisan tuod sa nagsunod nga unang mga adlaw sa Agosto, miubos ang gidaghanon sa nangatakdag COVID-19, wala kini magpasabot nga ang kredibilidad o puntos, mapunta sa GCQ sa Agosto.
Kon dili, mao kini ang resulta sa hinugtanayng pag-implementar sa miaging MECQ. Diin, tungod sa estriktong pagbantay sa Special Action Force miminus gyod ang mga tawong nanggawas.
Ang kadaghan sa nangadakpan niadtong Agosto 1, nagtumbok nga dili na gyod mabangbang ang kagahig ulo sa mga badlongon. Unta, may gamhanang puwersa nga makahumok sa ilang kasingkasing.
Kay kon magpabilin ilang kagahi, delikado gihapon ang pagsakag balik sa COVID-19 cases. Ug mobalik na sab ta sa uno?