Sukaranan ni Satanas

Akong naukayan ang librito kalabot sa Spritual Exercises ni San Ignacio de Loyola. Ginamit ang imahinasyon ug pantasya si San Ignacio nagdapit kanato ning mosunod:

1. Unang Punto: Hunahunaa nga nakig-atubang ka ni Satanas nga naglingkod sa iyang trono.

Ngil-ad kaayo ang iyang nawong, dunay aso sa iyang luyo, siga kaayo ang iyang mata.

Sa laktod nga pagkasulti lunlong kalisang lamang ang iyang nahatag.

2. Sud-onga ug hunahunaa nga gisugo ni Satanas ang tanan niyang mga demonyo aron moadto sa tanang suok sa kalibutan aron sa ingon walay mataligam-an, ang tanang mga tawo gikan sa nagkalain laing hut-ong sa katilingban. Ang tanan adtuon, ang tanan laglagon.

3. Sud-onga kun giunsa pagtudlo ni Satanas ang iyang mga demonyo sa paggamit sa tanang matang sa paagi malingla lang ang matag tawo.

Kinahanglang ihatag ngadto kanila ang tulo ka mga butang madanihon. Una, ang bahandi, dayon ang dungog ug dili maayong garbo. Kining mga butanga maoy magdala sa matag tawo ngadto sa ilang kalaglagan.

Ning panahon sa pandemiya lihok pud si Satanas. Hinuon wala kita makakita og mga sungayan ni ikogan. Apan dunay mga tawo nga anaa sa gahum nga padayong nagpakuyanap og  kalisang sa katawhan. Mga tinugyanan nga maghunahuna unta sa kinabag-an apan kaugalingon lamang ang giatiman.

Bisan gani sa ilang pangrason garapalan naman gyud nuon ang tanan. Mura og anaa nila ang way hinungdang garbo.

Daghang diversions gihimo ug ang mga tawo nga anaa sa ubos padayong nahasi sa panghadlok ginamit ang kuko ug sanggot sa kamatayon nga bisan gani ang pagpadayag sa kaugalingong panahom nahimo man nuong usa ka dakong salaod.

Dali ra kaayo buntogon ang usa ka panimalay nga walay kahiusahan. Maingon nga ang matag nasud dili mobarog labina kun nahimong halayo ra sa tinuod ang gipangindahay nga panaghiusa.

Kun kini halayo nan, unsaon man nato paghimo sa atong kaugalingon nga makalahutay sa matag katalagman kun kita mismo mangindahay sa kalaglagan sa uban.

Hayahay ang anaa pa sa gahum ug kanila nga nanguha sa dili unta ilaha.

Matud pa sa akong higala nga si Jeje Koka Barnes nga ang kadato nga wa hagoi sa madugay o madali mahanaw ra apan ang kadato nga pinatuloan og singot molungtad.

Dili tungod kay daghan ka og bahandi ni puno ka sa pasidungog ug anaa kanimo ang gahum apan ang imong pagkamaayo magpabiling lab-as ug lunsay sa panumdoman tingali dili sa kadaghanan apan sa pipila nga nahimong mahinungdanong kabahin sa imong kinabuhi.