GCQ makalipay makaguol

Tungod sa malamposong pagpahinay sa pagtinakdanay sa COVID-19, isip resulta sa hugtanong pag-implementar sa Modified Enhanced Community Quarantine (MECQ)’s protocols and policies dinhi sa dakbayan sa Sugbo, makahumpayng pagdayeg ang gitunol sa Malakanyang ngadto sa tanang Sugboanon.

Kini timaan, nga kontento si Presidente Rodrigo Roa Duterte sa nahimong tam-is bunga sa iyang pagpadala ni Department of Environment and Natural Resources (DENR) Secretary Roy Cimatu aron tabangan si Cebu City Mayor Edgardo C. Labella sa pagpakiggubat ning morag wala nay kamatayong kagaw nga kaaway.

Sayo nga gipakita-warawara sa Malakanyang ngadto sa taga Cebu City ang yawe nga makaluag sa kinandadohang kagawasan nga mibilanggo sa katawhan sulod sa hapit na molima ka bulang pag-inantos pagpas-an sa kabug-at. Ug migaangaan ang dughan sa mga nakasabot unsay mensahe niini?

Tuod man, pag-abot sa Hulyo 31, Biyernes, gianunsiyo ni Duterte nga ang MECQ sa Cebu City tangtangon na ug ipaus-os ngadto sa lower level nga General Community Quarantine (GCQ) sugod Agosto 1 hangtod Agosto 15, 2020, diin ubay-ubayng nasirad-ang balay-patigayon ang mangabli na.

Ang pangutana: ‘Makabalik pa kaha sa pagpangabli ang tanan? Makatrabaho pa kahag balik ang mga empleyado nga walay bisan usa kanila ang mahimulag o mawad-an sa hingpit?

Ning pagbukas sa mga tindahan ug trabahoan ubos sa pagtuman sa tanang kamandoan nga nalatid sa GCQ, daghan ang nangahaplang balay-patigayon ang dili na makabangon.

Busa, daghan pong mamumuo ang hingpit mawad-ag trabaho.

Suwerte ang mga empleyado sa dagko ug lig-ong kompaniya kay may mga nagdupa pang pultahan nga mapinanggaong mogakos sa ilang pagbalik ug andam mopadayon sa paghatag nilag inadlawng kapanginabuhian.

Sa wala mawad-ig trabaho, dili lunlon kalipay ang masinati. Kay bisag nag-GCQ na ang Cebu City, samtang naa pa si COVID-19, nga maglupadlupad-tugpa bisan asa, makasulod gihapon kini sa tinakpang palid sa trabahoan aron mangitag bag-ong biktimahon. Busa, dili kalikayan nga bation usab ang kabalaka ug kahadlok.

Unta, mahanaw na sa hingpit si COVID-19. Ug matuman lang kining maong panghinaot, kon ikaw, siya, ako, kitang tanan, Brod and Sis, mosanong sa tagsatagsa nato ka obligasiyon nga gisangon sa kagamhanan ning atong pagpakigbugno batok ning nag-inusara apan very deadly nga pandemiya.