Mag GCQ na ta uy

Nalipay ko nga mora’g may kahayag na nga sugod karong Sabado, mabalik na gyud ang Dakbayan sa Sugbo sa pagdeklarar nga General Community Quarantine (GCQ).

Si Environment Secretary Roy Cimatu mipahibawo na sa media nga pabor siya nga i-downgrade na ang quarantine category sa siyudad sa Sugbo tungod sa padayon nga pagkunhod sa mga kaso sa Coronavirus Disease.

Daan na hinuon ko nga miingon nga bisan pa og ang mga tinugyanan sa Cebu City Health Department, pinaagi sa Department of Health, moingon nga mimenos na ang mga kaso sa COVID-19, dili gyud gihapon ta angay’ng mokumpiyansa.

Mahimo man nga nikunhod ang gidaghanon sa mga tawo nga natakboyan sa COVID-19 tungod kay gamay ra ang gihimoan nila og testing sa tumong nga mokunhod ang statistics.

Ang nindot unta nga matinud-anon lang ang atong mga nagdumala sa City Health Department, ug ibutyag nila kon pila ang gikuhaan nila og COVID-19 test, unya pila ang napositibo.

Kon ingon niini nga pamaagi, ang publiko makaapil pagtan-aw kon tinuod ba nga mikunhod ang gidaghanon sa mga natakboyan og COVID-19 cases. Apan wa man nila ibutyag sa publiko kon pila ang gi-test, kay bisan gani ang positibo halos dili itug-an.

Ngano man nga sa ubang local government units (LGU) padayon man sila nga mipublikar sa coronavirus updates sa ilang lugar? Unsa may tumong sa Inter-Agency Task Force nga gidid-an ang City Health sa pagbutyag sa COVID-19 updates dinhi sa siyudad?

Katapusan nako nga nasayran, gamay na lang gyud ang kuwang, ug moabot na sa 500 ang nangamatay sa COVID-19 cases dinhi lang sa Dakbayan sa Sugbo.

* * *

Kon madayon nga madeklarar na ang siyudad og GCQ sugod Sabado, dili gyud gihapon kita mokumpiyansa. Magsul-ob gihapon kita og face mask, kanunay’ng manghugas sa atong mga kamot, unya likayan nato ang pakigdikit sa mga tawo nga dili nato kaila.

Pinaagi niini, makatabang kita nga momenos ang mga mapositibo sa COVID-19 dinhi sa atong siyudad. Unya, kon makabalik na pag-abli ang mga negosyo, makabalik na usab kita sa atong mga trabaho ug mohinayhinay na nga mahaw-as kamo sa kalisud.

Pero, karon pa gyud nako mahibaw-i nga bisan og daghan ang mga way trabaho, pero wa man kita makadungog nga dunay namatay sa kagutom.

Kaniadto, ang mga PUJ driver, mga taxi driver ug mga yanong trabahador, moingon dayon nga mamatay sila kon way trabaho.

Pero ang akong amigo miingon nga buhi man tinuod, apan daot. Busa, mag-ampo kita nga ugma, i-downgrade na sa atong kagamhanan ang quarantine category sa siyudad sa Sugbo.