Sa iyang ikalima nga State of the Nation Address kaniadtong Lunes, wala na usab palabya ni Presidente Rodrigo Duterte ang pagbira sa oligarkiya kinsa iyang gipasanginlan nga padayong naglansis sa kinabag-an sa katawhang Pilipinhon.
Pipila ka minuto pa lamang sa iyang diskurso, mibuwelta na si Duterte ngadto sa mga adunahan sa nasud. Iyang gi-single out ang mga Lopez sa ABS-CBN nga mibiktima kuno kaniya niadtong mikandidato siya sa presidential elections sa 2016.
Hinuon naandan na nga sumsoman sa presidente ang mga adunahan sa nasud. Matag diskurso niya sa bisan unsa mang okasyon, dili gayud si Duterte makalimot pagbalikas sa mga dato nga sige kunong nagpaburot sa ilang bahandi apan kulang sa ilang obligasyon sa buhis sa katawhan.
Hinuon daghan sa mga adunahan sa nasud ang nangurog niining sigeng gukod sa presidente kanila pinaagi sa pagbayad sa insaktong buhis ug pagtuman sa mga palisiya sa gobiyerno. Apan samtang miepekto usab kining krusada ni Duterte, dili gyud mawala ang oligarkiya sa nasud.
Bisan pa man sa panahon sa mga Katsila, ang oligarkiya kabahin na sa atong kultura. Gani, dili nato ikalimod nga dako usab ang papel nga gikuptan sa oligarkiya sa padayong pagdagan sa ekonomikanhong ligid sa nasud.
* * *
Sa laing bahin, angay lamang usab nga molihok na ang mga telecommunications company na nasud sa pagpalambo sa nag-aginod nga connectivity sa nasud, ilabina sa internet nga giingong usa sa labing hinay sa kalibotan.
Wala usab palabya ni Duterte ang paglatigo sa mga telco sa iyang SONA tungod kuno sa ilang dili maayong performance. Daan nang misaad ang presidente nga iyang pasudlan og ikatulo nga player kon padayon nga hinay ang internet connection sa nasud.
Niining padayong paghapak sa coronavirus disease sa nasud, dako gayud ang panginahanglan sa kagamhanan ug katawhan sa kusog nga komunikasyon bisan didto sa mga hilit nga kabaranggayan.
Kini ilabina nga kamulo ang pangandam sa national government sa pag-abli sa klase sa sunod buwan diin dako unya ang ang papel sa paspas nga koneksiyon sa internet tungod sa distance learning program sa Department of Education.
Atong gipaabot nga mopakusog usab sa ilang serbisyo kining mga telco sa nasud. Kini aron usab pagsagubang sa dakong demand. Hinuon, misaad na ang mga telco nga ilang pakusgan ang ilang serbisyo. Ug kini maoy atong atangan.