Unsa pa man tuod ang mahimo?
ARANGKADA - Leo Lastimosa (Banat) - July 14, 2020 - 12:00am

Unsa pa man tuod ang mahimo sa ABS-CBN Corporation human ibasura sa 70 ka kongresista ang iyang aplikasyon alang sa bag-ong prangkisa? Kon mosumiter og laing aplikasyon ug kon may kongresista nga mopasaka og bag-ong balaudnon paglab-as sa prangkisa mahimo ra gihapong yak-an ug isalikway na sab.

Di kadangop ang ABS-CBN sa mga hukmanan kay human gilumloman sa Korte Suprema og kapin sa duha ka buwan ang petisyon alang sa temporary restraining order batok sa cease and desist order sa National Telecommunications Commission di na makuwestiyon ang hukom sa mga kongresista.

* * *

Unsa man tuod ang mahimo sa mga nahimangod ug nasuko sa pagsalikway sa 70 ka kongresista sa tanang ebidensiya nga nagmatuod nga way kalapasan nga nahimo ang ABS-CBN ug sa ilang kaugalingong kapakyas pagmatuod sa bisan usa sa ilang mga pasangil?

Di sila mahimong magtapok pagprotesta sa kadalanan kay kuyaw nga posasan ug pasanginlang nakalapas sa community quarantine.

Kay bisan ang noise barrage sa nagkalainlaing bahin sa nasud peligrong himuong sukaranan pagdakop ug pagtanggong nila hangtod sa 24 ka adlaw nga way kaso ubos sa gipirmahan nang Presidente Rodrigo Duterte nga Anti-Terrorism Law.

* * *

Unsa man tuod ang mahimo sa mga abogado nga, naalarma sa pagpahilom sa ABS-CBN, modangop sa pagtakda sa batakang balaod sa people’s initiative aron ang katawhan makalaktaw sa Kongreso sa pagduso og balaudnon?

Kay samtang sayon rang pagkolekta og unom ka milyon ka pirma, magkinahanglan ang Commission on Election og P4 bilyones, nga di mahitabong ihatag dayon sa mga kongresista nga mao ra say niluba sa prangkisa.

* * *

Unsa man tuod ang mahimo sa mga tigpaminaw ug tigtan-aw sa ABS-CBN?

Ang ilang pagpadayon sa pagsunod, pagpaminaw ug pagtan-aw sa among mga tulomanon sa alternatibong mga plataporma sa SkyCable, Facebook ug YouTube maoy labing kusganong siyagit sa protesta nga ilang mapalanog ngadto sa mga nagtungkawo sa gahom.

Ang padayong pagsalig sa kinabag-an sa mga Pilipinhon mao ang tinuod nga gahom sa ABS-CBN, kay nagtimaan sa ilang pagsalikway sa tanang pamakak ug pahimus sa kurakot sa mga opisyal sa gobyerno.

Naluya ug nalup-og ta karon. Apan, samang napakyas ang nangaging mga pagpanggukod ug pagpangulipon, makabalik ra ta pagbarug nga mas lig-on.

* * *

leo_lastimosa@abs-cbn.com

ABS-CBN
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with