Kalisod nga dala sa COVID-19

Dili sayon ang kalisod nga natagamtaman karon sa katawhan dinhi sa nasud ug sa hapit tanang nasud sa kalibotan tungod sa virus nga manakod ug makamatay. Apan bisan pa man niini, daghan gihapong tawo ang wala makasabot sa pagkaseryoso sa suliran nga giatubang karon sa kanasuran sa kalibotan.

Niadtong Domingo, Hulyo 5, 2020 miabot na og 11,093,182 ka tawo ang mga natakdan sa Coronavirus Disease 19 sa tibuok kalibotan. Miabot na usab og 525, 491 ka tawo sa tibuok kalibotan ang gipatay sa coronavirus disease 19. Samtang anaa lamang sa 5,890,052 ang mga naayo.

Sa Pilipinas, miabot na usab og 41,830 ang mga nagpositibo sa coronavirus samtang miabot na usab og 1, 290 ang mga namatay. Hinuon miabot pod og napulog usa ka libo upat ka gatos kalim-an ug tulo ang mga naka recover na sa virus.

Ingon ani ka seryoso ang suliran nga gibaliwala lamang sa katawhan.

Sa dakbayan sa Sugbo, suliran na usab ang kakuwang sa mga tambalanan ug medical personnel nga makahikotar sa mga nataptan sa virus. Gawas niini, dako usab nga suliran ang mga sam-ang nga kalubngan sa mga namatay tungod kay mga puno na kini. Taas na usab ang linya sa mga crematorium tungod sa kadaghan sa mga patay nga sunogonon.

Makasabot na unta ang mga tawo sa ka seryoso sa suliran aron mahuman na ta sa atong mga pag-antos ug kalisod.