^

Banat Opinyon

Dili pa ni mao

RENBOR PATROL - Rene U. Borromeo - Banat

Kining padayon nga pagsaka karon sa gidaghanon sa mga kaso sa Coronavirus Disease dinhi sa Dakbayan sa Sugbo ug silingang mga dapit, dili pa kini resulta sa pagdeklarar sa kagamhanan og General Community Quarantine (GCQ) sugod kaniadtong Hunyo 1.

Resulta kini sa sagunson nga pagpahigayon og swab test sa Cebu City Health Department, niadtong mga tawo nga nasuta nila nga may timailhan nga positibo sa COVID-19 human gihimoan og rapid testing diha sa kabarangayan.

Napanid-an nako nga halos kada adlaw, tag kapin usa ka gatus ka bag-ong mga kaso sa COVID-19 ang madugang sa talaan dinhi sa siyudad. Tan-aw nako, mosamot pa gyud pagpanakod ang Coronavirus Disease karong nagsuroy-suroy na ang mga tawo kay GCQ na man.

Apan, wa kita’y mahimo kay kinahanglan man gyud nga motrabaho ang katawhan aron sila mabuhi. Wa sila’y mahimo sa kagamhanan nga usahay magpatuga-tuga og lockdown sa usa ka dapit apan dili makahatag og pagkaon sa tanang apektadong lumolupyo.

Manghatag man tuod og bugas ang kagamhanan apan pwerteng gamaya ra nga dili paigo nga kan-on sa mga sakop sa pamilya nga nagkutoy ang tiyan sa kagutom. Kon manghatag man og tag 25 kilos nga bugas, unsa may ilang isud-an?

Kon ang usa ka pamilya dunay lima ka sakop, molahutay ba ang 25 kilos nga bugas hangtud sa duha ka semana? Swerte gani kadtong uban nga nakadawat og P6,000 gikan sa Social Amelioration Program (SAP) cash assistance, apan kadtong wa gyud tawon makadawat, unsaon man nila?

Kini maoy rason ngano nga ang mga tawo gusto na gyud nga ilibkas ang pagdeklarar og quarantine aron mabuksan na ang ilang gitrabahoan og makabalik sila pagpanarbaho, bisan og nasayod sila nga peligro kaayo nga matakboyan sila sa makamatay’ng sakit.

* * *

Bahin sa kagamhanan, makasabot sab ko nga naglisod na ang mga opisyal nga ipadayon ang pagdeklarar og estrikto nga matang sa quarantine kay hapit na sila mahutdan og pondo nga   magasto.

Aw, tingali, may ubang opisyal sab nga sa hilom nangalipay kay makatigum man sila gikan sa mga komisyon nga madawat nila gikan sa gipalitan nila og mga bugas, delata nga pagkaon ug ubang kagamitan pag-alkontra sa COVID-19.

Gani, may nagduda nga adunay mga opisyal nga nakakuwarta pagpamalit niadtong kahimanan nga gigamit pagpahigayon og rapid test. Apan kay wa man ta’y kamatuoran niini, igo ra kita nga magpaabot nga gabaan kadtong mga tawo nga nanguwarta sa gahin para alkontra sa COVID.

MAO

Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with