Bisag ubos na sa general community quarantine (GCQ) ang lalawigan ug mga siyudad sa Sugbo, masinati gihapon sa mga namalik sa ilang trabahoan ang dakong suliran sa transportasiyon.
Kini tungod kay hugtanay mang gipasunod sa atong kagamhanan ang social distancing.
Usa ray gitugotang makasakay sa motorskilo – ang drayber ra. Ang tumong?
Aron malikayan ang daling pagtinakdanay sa COVID-19. Apan wala kini makita sa tanang mata.
Ngano kuno nga ang magtiayong mag-angkasay sa motorsiklo did-an, nga dili man sila mag-social distancing didto sulod sa ilaha?
Gani, magdungan pa silag pangaon uban sa ilang mga anak.
Unya magdulog pa gyod sa higdaanan inig hugpa sa kagabhion?
Mao kini ang atubangang nawong nga ilang gitutokan.
Ang para ra gyod sa ilaha. Wala nila sulayi pagtan-aw ang likod aron unta makita sab ang mga rason nganong gidid-an sila sa mga magbabalaod?
Hinungdan, nga mora silag mga isog iro nga sigeg paghot:
‘Nganong dili man sila tugotan sa pagpaangkas sa ilang mga minahal nga usa ra man ka pinuy-anan ang gilubloban nilang tanan?’
Nabati ang mga nagbakho-pakiluoy nilang tiyabaw ni Cebu Gobernador Gwen Garcia, kinsa usa ka workaholic, mapinanggaon ug manggihunahunaong inahan.
Dihadiha, mipanday siyag executive order nga magtugot sa adunay motorsiklo nga mahimo nang magpaangkas sa ilang asawa, anak, o igsuon, kinsa anaa ra tipon-puyo sa ilang balay. Ingon niini kamahal ni Gwen ang mga Sugboanon.
Apan wala pa gani matuki sa Cebu Provincial Board ang maong executive order, dali kining gibawi sa gobernadora dihang hugtanay siyang gipasabot ni Pres. Rodrigo R. Duterte nga gidili gyod ang backriding.
Sa backriding god, dili man mamili ang COVID-19. Bisag asawa ang angkas, takdan gihapon.
Mas risgo kon duhay sakay sa motorsiklo. Kay kon asa sila paingon, imbes usa ray matakdan, duha dayon. Busa, inig uli sa balay, imbes drayber ray COVID-19 carrier, hasta angkas apil ini ang giladlad sa taga IATF ug Tatay Digong sa pikas nawong sa NO BACKRIDE POLICY nga wala makita sa tanan.
Hinuon, saludo kong Gob. Gwen. Kay iya gyong gipangitaag paagi nga mahatagag katumanan ang giyangongo sa mga motorista.
Apan dili man mosugot si Tatay Digong, uy! Aw, pasensiya, wala tay mahimo.
Nice try, Gob!