Nganong padayon ang COVID-19?

Adunay dakong kausaban ang atong pagpakigkumbati sa coronavirus disease dinhi sa Sugbo bisan pa man kon wala pa nato matino kon padulong na ba kita sa dakong kadaugan batok niining maong sakit.

Sa niaging semana, mius-us ngadto sa general community quarantine ang status sa lalawigan sa Sugbo, lakip na ang dakbayan sa Lapu-Lapu. Tungod sa pipila ka kaso sa COVID-19, ang siyudad sa Talisay gipailalum una sa modified ECQ.

Apan tungod lagi sa padayong paghasi sa coronavirus disease, pabilin ang mga dakbayan sa Cebu ug Mandaue ilalum sa enhanced community quarantine.

Gani kamulong pangita og mga estratehiya ang maong mga LGUs pagkontrol sa pagkuyanap sa maong sakit.

Kini basi usab sa rekomendasyon sa Inter-Agency Task Force for the Management of Emerging Infectious Diseases. Nakita sa task force nga kusog pa gihapon ang presensiya sa virus sa maong duha ka siyudad ug walay rason nga ipaubos ang quarantine status.

Apan bisan pa man niini, morag kumpiyansa ang kinabag-ang molupyo sa duha ka dakbayan. Kini gumikan kay daghan ang mibaliwala sa lagda kabahin sa kamahinungdanon sa pagpabilin sa ilang panimalay.

Gani, sa siyudad sa Sugbo, akong naobserbahan nga mas midaghan hinuon ang mga naglatagaw karon sa kadalanan. Klarong wala nila hisabti nga pabilin pa ang dakbayan ilalum sa ECQ ug nga limitado gihapon ang paggawas sa panimalay.

Gani, sa akong nakita, mas midaghan usab ang mga sakyanan nga nagbahis karon sa kadalanan sa duha ka dakbayan. Ambot kun unsa nay nahitabo sa kampanya nga limitahan ang mga sakyanan sa kadalanan ilalum sa ECQ.

Unsay gibuhat sa otoridad, ilabina sa kapolisan nga maoy gitahasan pag-implementar sa order sa lokal nga pangagamhanan? Nagpasabot ba kini nga milugak na usab sila sa pagpahamtang sa lagda kalabot sa stay at-home-policy?

Kon mao kana, dili usab nato mabasol ang katawhan kon padayon sila nga molapas sa order sa pagpuyo una sa panimalay. Kay lagi naanad na silang mogawas tungod kay walay mosita ug mobadlong kanila.

Ang padayong presensiya sa makamatay nga virus mugna usab sa pagkagahi sa ulo sa uban nga dili mopatuo sa lagda sa kagamhanan. Kon nisunod pa lamang unta ang kinabag-an, dili unta ingon niini ang gidaghanon sa mga nataptan sa coronavirus dinhi.