Usa ka matang sa paghinanggaw

Ang mga opisyales sa dakbayan sa Talisay ug Carcar ingon man sa lungsod sa Consolacion mipadayag sa ilang hangyo ug pagsuporta nga tugotan na sa nasudnong kagamhanan ang pag-backride sa mga motorsiklo taliwala sa kanihit sa pampublikong transportasyon.  Praktikal ug maugdangon ang maong sugyot/hangyo, apan nagmagahi gihapon ang taga DOTr. Mao tingale kini ang matang sa hinanggaw nga gipasabot sa pagya nga, “Kon tabunan nako akong dalunggan, dili ko makadungog.  Kon piyongon nako akong mga mata, dili pud ko makakita”.  Hala no! 

Wa’y koordinasyon o namolitika?

Gibasol ni Guadalupe Barangay Captain ang Mayor’s Information and Liaison Office (MILO) sa nahitabong kaguliyang sa pagpang-apod-apod sa financial assistance sa mga senior citizens tungod kay wala mo-coordinate ang MILO sa mga opisyales sa barangay.  Sa maong pasangil ni Kap Gacasan, wala niya diretsoha pagtumbok ang tinuod nga rason nga mao ang pamolitika.  Matud pa bitaw sa panultihon, “Ang tawo mahimong moangkon sa sala nga pagsunog, pagpatay, o nga pustiso iyang ngipon o ba kaha wig ang iyang buhok, apan dili gayod siya moangkon nga wala siya makig-coordinate”.  Madahaan!

Overprice taliwala sa krisis

Namahayag si Spokesperson Harry Roque nga buot si Presidente Duterte nga imbestigahon ang giingon nga pagpaburot sa presyo sa mga medical supplies ug ekipo alang sa COVID-19 nunot sa taho nga namalit ang DOH niini nga “overpriced” bisan sa nahitabong krisis karon.  Kon tarongon lang ang maong imbestigasyon, hayan adunay mga ulo nga mangligid apan dili kini igsapayan sa hingtungdan kay napuno nga man ang bulsa sa mga kanahan. Wa uroy gaba-i!

Ayaw’g to-o basta sulti lang!

Usa ka siyentipeko sa Estados Unidos nga si William Haseltine nagkanayon nga ang katawhan dili angay nga mosalig sa sulti sa mga politiko nga aduna na’y umaabot nga bakuna alang sa COVID-19.  Alang ka Haseltine, ang labing maayong paagi pagbuntog sa pandemic mao ang makuti nga contact tracing ug istrikto nga pag-isolate sa tawong nataptan sa virus.  Matud pa bitaw sa akong apohan, “Basta gikan sa politiko, ayaw’g to-o basta sulti lang; kinahanglan pamatud-an”.  Mao gyud!

Waving goddbye na unta

Namulong si Dr. Andrea Ammon, ang director sa European Center for Disease Prevention and Control, nga kinahanglan mangandam ang Europe sa second wave nga paghugpa sa corona virus tungod kay dili gayod kini kalikakayan nga mahitabo.  Dinhi sa Pilipinas, namulong na ang Health Secretary nga anaa na kita sa second wave bisan pa man nga gisaway kini dayon sa Malacañang.  Apan ang gihandum sa akong amigo nga unta mo-WAVE GOODBYE na ang COVID aron makapatupi na kuno siya sa iyang kulot apan nagkanihit na nga buhok nga daw nag-Waving Goodbye na usab sa iyang ulo.  Hala no!