Due process sa pag-terminate og empleyado

Dear Atty. Divine,

Nagtrabaho ko sa usa ka kompaniya sud na sa lima ka tuig. Last year, mi assume ang among bag-o nga manager nga estrikto kaayo. Tungod niini, lima sa akong mga kaubang employees iyang gitaktak sa trabaho ug wa gani imbestigasyon. Ang akong pangutana kun pwede ba diay taktakon dayon ang empleyado kon makahimo kini og kalapasan? Daghang salamat.

Roger

* * *

Dear Roger,

Basi sa Labor Code kini nagkanayon nga ang employer mamahimo lang nga motaktak sa employee basi sa just cause ug authorized  causes. Apan gikinahanglan gyud  ang paghatag og due process  sa pag-terminate og empleyado bisan pa kun kini adunay nahimong kalapasan. Apil niini ang pagpahibawo sa employee sa nahimo niining kalapasan ug paghatag kaniya og higayon sa pagtubag og pagpresentar og ebidensya. Pahibaw-on sab ang employee sa resulta sa  imbistigasyon og sa silot nga ipahamtang niini. Kun dismissal ang silot kinahanglan nga  hatagan og notisya ang empleyado og pahibaw-on sa ground sa pag-terminate kaniya 30 days sa dili pa kini hingpit nga ipatuman. Busa kun wa motuman sa due process ang imong employer pag-terminate sa imong kauban mamahimong invalid ang maong termination ug pwede silang mopasaka og reklamo sa NLRC. Thanks and God bless.

* * *

Atty. Divine

Kun duna moy pangutana please email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.