Susiha inyong prioridad

Tinguha sa dakbayan sa Sugbo ang pagtukod og laing quarantine facility diha sa South Reclamation Properties alang kuno sa mga asymptomatic nga pasyente sa COVID-19 gikan sa south district.

Ang konseho mipasar na sa miaging semana sa P50M nga budget alang sa katukuran sa maong proyekto.

Gitawag ni ni Vice Mayor Michael Rama nga NOAH project (New Normal Oasis for Adaption and a Home Complex).

Maglangkob ni sa conversion sa tulo ka ektarya nga luna nga nahimutangan sa mga studio sa  Bigfoot ngadto sa usa ka quarantine facility.

Sumala pa ni Rama, ang maong facility maoy butangan sa 9,432 ka mga tawo nga namatud-ang positibo sa COVID-19 apan wala mopakita og sintomas sa sakit.

Kataw-anan nga sa iyang paningkamot nga makumbinsir ang publiko ug kapanalipdan ang dakong gahin alang sa proyekto, nabisto ang kadudahan niyang motibo pinaagi sa pagpaburot og maayo sa gidaghanon sa mga nagpositibo sa COVID-19.

Diin man punita ni Rama ang 9,432 nga iyang giingon nga positibo sa COVID-19?

Ang talaan sa City Health Department nagpakita nga anaa ra sa 1,700 kapin ang gidaghanon sa mga positibo dinhi sa dakbayan.

Usa ka klarong pag-waldas sa buhis sa publiko ang pagpatukod og laing quarantine facility tungod kay bag-o lang nahuman ang P100M nga facility diha sa North Reclamation Area.

Gani hangtud karon wala pay sulod ang maong quarantine facility.

Gawas niini anaa pud ang Bayanihan Center ug ang IEC Pavillion.

Gawas sa Bayanihan nga dunay 12 ka pasyente nga gi-quarantine ang IEC Pavillion wala pay sulod tungod kay sagad sa mga asymptomatic nga pasyente tua ibutang sa mga tunghaan nga gihimong Barangay Isolation Center.

Busa kun mahimo ra nga ang mga tunghaan maoy gamiton dugang sa bag-ong nahuman nga quarantine facility sa dakbayan nganong kinahanglang magpatukod og lain?

Dili ba mas kapuslan og ang pundo gamiton sa pagpahuman sa Cebu City Medical Center?

Tingali angayang susihon sa mga opisyal sa dakbayan ang ilang prioridad.

Angayang pangutan-on nila ang ilang kaugalingon unsa may labaw’ng gikinahanglan karon pagtubag sa krisis?