Dear Atty. Divine,
Ang among ginikanan dunay gibilin namo nga commercial building ug amo ni karong gipaabangan. Ang income sa building among gibahin in equal share matag buwan sukad namatay ang among mama kay una man nga namatay ang among papa. Upat mi ka magsuon ug nagsabot mi nga dili gyud namo ibaligya ang among tagsa-tagsa ka shares. Apan nabalaka ko nga di motuman ang uban namong igsuon sa maong sabot ug matintal unya sa pagbaligya. Ang akong pangutana kun pwede ba kami magpirmahanay og kasabutan aron pagseguro nga wa gyuy mobaligya sa among share sa maong building? Daghang salamat.
* * *
Mary
Dear Mary,
Yes, mamahimo mo nga maghimo og kasabutan alang sa pagpabilin sa inyong co-ownership sa building sud sa pipila ka tuig aron pagsiguro nga way heirs nga mobaligya sa ilang share niini. Bisan tuod kun basi Art. 494 sa atong Civil Code of the Phils., kini nagkanayon nga way co-owner nga ma-obligar nga magpabilin sa co-ownership ug mamahimo kining mo-demand og partition sa undivided property alang sa pagkuha sa iyang share anytime, apan duna kini exception ug kini mao nga kun dunay kasabutan nga ipabilin ang co-ownership sud sa pipila ka tuig, valid kini provided nga di kini mosobra sa 10 years ug mamahimo pa kining ma extend pinaagi sa bag-ong kasabutan. Busa ang maayo ninyong buhaton mao ang pagpirmahay og kasabutan nga magpabiling undivided ang building sud sa pipila ka tuig basta dili lang mosobra sa napulo ka tuig. Thanks and God bless.
Atty. Divine
* * *
Alang sa inyong pangutana palihug lang sa pag email sa flores_divina@yahoo.com og akong tubagon ang inyong pangutana pinaagi sa akong column matag Miyerkules, Sabado og Domingo.