Sabutahi

Angayan lang nga masuko si Gobernador Gwendolyn Garcia sa ubang mga ahensiya sa kagamhanan nga inay motabang aron malikayan ang dugang pagkatap sa COVID-19, nisabotahi na hinuon sa paningkamot sa lokal nga mga opisyal pagsanta sa krisis.

Usa sa mga ehemplo sa pagsabutahi sa mga paningkamot sa lokal nga kagamhanan sa lalawigan mao ang gihimo sa Office of Civil Defense (OCD) didto sa Bicol Region nga paghatag og certification sa 3 ka mga OFWs aron makatabok paingon dinhi sa Sugbo.

Ang tulo mga molupyo sa Samboan, Tudela, ug Talisay City. Nasayran ni Gobernador Garcia ang pag-abot sa tulo human moreport niya ang mga mayor sa Tudela ug Samboan sa pagsuway og sulod sa maong mga OFWs sa ilang lungsod.

Nasuta nga ang OCD-5 miangkon nila nga ilang mga kawani ug miawhag sa kapolisan ug coast guard nga tugotan nga makalabang sa border checkpoints.

Ang taga Talisay City nakalusot gyud tungod kay nakapakita kini og quarantine certificate nga giluwatan sa usa ka kapitan sa barangay Ermita didto sa Manila.

Ang pag-abot sa maong mga OFWs tataw nga wala gyud masubay sa lagda nga gilatid sa Inter-Agency Task Force.

Sigun sa lagda, ang mga OFW nga moabot kinahanglang dunay Certificate of Quarantine gikan sa DOH o ba kaha sa  usa ka local health officer diin siya mipaubos sa quarantine.

Kinahanglan siyang dunay  travel pass gikan sa Bureau of Quarantine ug Certificate of Acceptance gikan sa local chief executive sa dapit nga iyang adtoan.

Buot ipasabot niini nga kinahanglan nga pahibaw-on ang mayor o ba kaha gobernador nga dunay moabot aron sila mabantayan ug masiguro nga masunod ang quarantine protocol.

Apan ang nahitabo mao nga wala gyuy kalibutan ang mga lokal nga opisyal nga duna na diay nangabot sa ilang dapit hangtud nga ilang nadiskubrehan.

Salamat nalang nga igmat ug maayo ang ilang monitoring.

Bisan kadtong kapin sa 300 nga nangabot niadtong Martes sa kadlawon uwahi na sad kaayo ang kumunikasyon nga niabot sa  LGUs dinhi sa Sugbo.

Angayang sigurohon sa IATF nga mosunod ang tanang ahensiya sa ilang mga lagda ug likayan nga pakalitan ang mga LGUs.

Dili tiaw ang paningkamot sa lokal nga mga opisyal sa Sugbo aron masulbad ang krisis. Busa angayang suportahan ang maong paningkamot inay nga sabutahion.