Life or death?

Maximum tolerance. Mao kini ang gipakitang kinaiya sa mga kapolisan ug volunteers nga nagbantay sa checkpoints nga giali sa kadalanan.

Kon may magpabadlong, igo lang istoryahan, seminaron, hatagan og another chance.

Ug kon adunay madakpan sa curfew, kon dili ibuwad sa init, palimpiyohon sa hugawng kanal.

Ilang gilikayan ang pagbakyaw sa ilang mga kamot ngadto sa sipat nga mga badlongon.

Pipila sa kapolisan, miplastar og lungon sa mga checkpoints, diin may nagbitayng pahibalo: ‘STAY HOME OR STAY INSIDE?’

Hinigalang paagi pagpahinumdom sa tanan nga kinahanglang sundon ang Enhanced Community Quarantine nga hagbay rang gimandar sa kagamhanan agig pakigbatok ning dili makitang kaaway nga mikutlo nag daghang kinabuhi.

Aduna nay mga pasawayng nadakpan. Apan inay isulod sa lungon, igo rang gipapas-an sa lungon ug gipapaso sa karsada.

Tuod, giedukar bahin sa unsa kakuyaw ang giatubang natong COVID-19 ug human mahatagig leksiyon, gipapauli ra sa ilaha.

Ingon niini ra kagaan ang silot nga gipahamtang sa kapolisan ngadto nila.

Hinungdan, nga giabuso sa mga walay kaikog sa iyang isig ka ingon.

Sa mga merkado, samot na sa isdaan, ang mamalitay nagpunsisok gihapon. Dili tanan nagsul-ob og face mask. Uban nilang nagsul-ob, morag nagsul-ob og hapin nga nahushos.

Haskang bantanga sa duruha ka lungag sa ilong nga milugwa. Aw, lipay kaayo ang corona virus. Hahayy, buhay!

Sa mga binantayang karsada, naa gihapoy di kaantigo motahod sa social distancing. Samot na sa mga hilithilit nga walay nagbantay.

May magpundok nga magsugal, maghuboghubog, magboksing ug magduladulag basketbol. Gibalewala lamang nila ang binilyon ka pesos nga nagasto sa gobiyerno diha sa pagpakig-away sa COVID-19, diin imbes ilang tabangan, gipun-an pa hinuon nilag laing bug-at nga suliran.

Hunahunaa lang. Ang usa ka tawo nga mapositibo sa COVID-19, magrabehan, ma-ICU, makaestar sa ospital og 15 ka adlaw, unya maluwas, mogasto kinig P1M kapin. 

Pila man kahay magasto sa gobiyerno kon ang usa ka lugar, diin nagdikitdikit ang kabalayan, ang tanang residente magkatinakdanay ug moagi sa samang situwasiyon tungod kay naangin lang sa usa o duha ka badlongon?

Mga kaigsoonan kong Pinoy, ania ta sa panahon nga kita gipapili: Life or Death? Please help save our nation. Choose the best before it’s too late.