Pagtuo ning panahon sa COVID

ABRIL 19, 2020: Ikaduhang Domingo sa Pasko

sa Pagkabanhaw (Divine Mercy Sunday)

Mga Pagbasa: Buh. 2;42-47/Sal. 118/1 Ped. 1;3-9/Jn. 20;19-41

Usa sa mga natay-og pag-ayo ning panahon sa pandemic mao man ang pagtuo sa matag sa tawo. Ang mga pangutana sama sa: “KUN ADUNA PAY GINOO NGANONG NITUGOT MAN SIYA NGA MAHITABO KINI KANATO?” KINSAY ANGAY BASULON? KINSAY ANGAY MANUBAG?”

Ug didto sa China ang mga Kristohanon nga gilutos bisan pa  man kun nisalmot lang sila sa online worship ang makapangutana usab samang pangutana.

Apan angayan natong timan-an nga ang pagtuo dili lang mahitungod sa atong pagtugyan sa atong hunahuna ug pagbati ngadto sa atong gituohan gumikan sa kapasikaran nga malisud alang nato ang pagtugkad niini. Apan ang pagtuo nagpasabot man og pakigrelasyon sa atong gituohan. Nituo kita kay nahimo man siyang kabahin sa atong kinabuhi mas suod nga paagi.

Si Tomas nipadayag sa iyang pagduda sa nabanhaw nga Ginoo. Ang maong pagduda ang nakapaaghat niya nga mangita og pagmatuod sa maong kabanhawan. Matud pa niya nga kun mahikap lang niya ang mga samad sa nagkadaiyang bahin sa lawas niini, anha pa siya motuo.

Ug tuod man ang maong pangindahay nahatagan og tubag sa dihang ang Ginoo mismo nimando kaniya sa paghimo sa ingon. “Hikapa ang akong mga samad, tuo ug ayaw na pagduha duha!” si Tomas sa laing bahin mituwaw: “Ginoo ko ug Dios ko!”

Ning panahon sa pandemonyo gumikan sa COVID-19 nga gikan sa Wuhan, China, dako kaayo ang kadaut nga nahitabo. Ako kining gitawag og pandemonyo tungod kay ang tumong ug tuyo sa demonyo mao man ang pagbungkag ug pagdaut ekonomiya, relasyon, pagsalig ug uban pa. Nahimong virtual ang tanan alang kanato ning mga higayona gumikan ning maong virus. Malisod kaayo sabton ni tugkaron ang pulong pagtinabangay kun nahimong selective ang panghunahuna sa angayang tabangan. Mas makapawala sa gana kun diha sa social media nga mga tawo nga gitabangan human nakadawat sa ayuda ang iresponsableng migamit niini sama sa pagpalit og mga shabu, pagsugal, inum ug uban pa. Nahimong dili patas kay mas nakita nga daw sa nakapabor ang mga No Work Since Birth kaysa mga No Work No Pay!” Ang mga gikaltasan og buhis panahon sa ilang pagtrabaho nahimo man nuong makontento na lang sa ginamos samtang ang uban nagkaon og lamiang potahe. Dili ba unfair?

Dugang pa daghan sa mga tawo ang nahimong nakasentro na lang sa kaugalingon. Kalimot sila nga dunay ubang mga tawo nga mas nagkinahanglan pa kay kanila. Buot magdoble doble aron lang mabuhi samtang ang uban gutom ang giabot.

Hikapa ang akong mga samad, tuo ug ayaw pagduha duha assurance kini nga sa atong pag-antos karon nahimong kabahin ug usa ang Ginoo kanato ning panahon sa dakong kalisdanan. Usa sa mga parokyano nangutana kanako kun nganong ang bugas niya nga gihatag ako man pud giapod-apod.

Ako siyang gitubag nga ako ning gihimo aron sa ingon mamahimong mas masinati sa mga tawo nga anaa ang simbahan. Dili ko samang Francis Leo Marcos ug wa koy hustong tigom apan sayud ko nga ning panahon sa kalisdanan ang salapi dili maoy bugtong sukaranan nga mamahimong seguro ang imong kaluwasa.

Divine Mercy Sunday karon, mao nga atong hinumdoman nga Diosnong kaluoy dili gyud mohubas sa pagkalooy kanato. Dili sama sa suba sa Mekong nga gibabagan aron ang taga mangalawos ang mga tanum sa laos!