Krimen batok sa katawhan

Taliwa sa dakong krisis nga giatubang sa nasud ug sa tibuok kalibutan nunot sa makamatay nga kagaw sa COVID-19,  maisip nga dakong krimen batok sa katawhan sa pagkakaron ang pamolitika.

Gikinahanglan sa nasud ang panaghiusa sa katawhan labi pa sa atong mga piniling opisyal sa gobyerno aron mabuntog ang padayong pagkaylap sa sakit ug mabalik ang naandan tang kahimtang sa kinabuhi.

Way gipili ang COVID-19, kabus ug adunahan, bata ug tiguwang nabutang sa piligro. Busa gikinahanglan ang hiniusang mga lakang sa gobyerno ug sa pribadong hut-ong sa katilingban aron magmalampuson ang gubat batok sa maong sakit.

Busa dihang migawas ang balita mahitungod sa awhag ni Commissioner Manuelito Luna sa Presidential Anti-Corruption Commission (PACC) ngadto sa National Bureau of Investigation (NBI) nga imbistigahan si Bise Presidente Leni Robredo tungod sa matud pa pakigkumpetensiya niini sa gobyerno sa pagsulbad sa problema, daw sama sa ningi-ob og kalit ang atong paglaum nga mahuman og sayo ning pandemic nga atong giatubang.

Daw sa nahanaw ang atong paglaum ug pagsalig sa administrasyong Duterte. Apan salamat nga mismong ang presidente maoy mipauli sa niawop na untang pagsalig dihang iyang gipahibawo ang iyang pagtangtang kang Luna sa katungdanan.

Husto ang disisyon ni President Duterte sa dinaliang pagpalagpot ni Luna.

Dili makatabang sa pagsulbad sa krisis ang pagpasipsip sa presidente nga wala sa lugar.

Labaw sa tanan, husto ang presidente nga ihiklin ang politika ug hangpon ang ayuda gikan sa iyang bise presidente.

Hinaut nga ang gihimo sa presidente mahimong panag-ingnan sa lokal nga mga opisyal nga hangtud karon nagpabiling hubog sa politika.

Ang pagpatigbabaw sa politikanhong interest maoy hinungdan sa kaguliyang. Kini imong makita diha sa kabarangayan sa dakbayan sa Sugbo.

Hangtud karon wala masulbad ang daghang reklamo sa mga molupyo sa pagpanghatag sa hinabang.

Samtang nangugat si Mayor Edgar Labella pagpasabot nga way pamolitika ug way gipili ang hinabang apan dili ni maoy sitwasyon diha sa kabarangayan.

Ug kini nahitabo tungod sa iyang kakuwang og pagsalig sa katakos sa mga piniling opisyal sa barangay nga dili iyang kaalyado.

Ang iyang padayong pagtugot sa Mayor’s Information and Liaison Office kon MILO nga makigkumpetensiya sa barangay maoy nagdala sa kasamok. Kun seryoso ang mayor sa iyang mga pulong angayang hunongon una niya ang operasyon sa MILO niining panahon sa krisis aron malikayan ang kaguliyang.

Dinhi sab makita sa katawhan unsa ka takos ang ilang mga lider nga gipili diha sa barangay.