Walay pamolitika

Niining atong panahon karon, mahinungdanon ug maoy gikinahanglan ang panaghiusa ug pagtinabangay natong tanan. Sa ato pa, tungod kining kagaw sa politika mao may nagkatibulaag kanato, ato kining isalikway, at least bisa’g temporarily lang, hangtud nga makalingkawas na kita gikan niining kagaw nga naghulga sa atong kinabuhi nga mitakboy na sa tibuok kalibutan.  Nalipay kita niining pamahayag ni Mayor Edgar Labella ning dakbayan nga walay labot ang politika niining pagpanghatag sa mga hinabang ngadto sa hingtungdang mga molupyo nga nawad-an sa panginabuhian  gumikan sa epekto sa Coronavirus.

Matud ni Labella, kining giingon nga gikinahanglan voter’s registration aron makadawat sa hinabang, “is farthest from the truth.” Sa samang higayon, nanawagan ang Mayor sa tanang opisyales sa barangay, “to unite and set aside politics amid the health crisis. In fact, akong gipatawag ang mga MILO (Mayor’s Information and Liaison Officer) ug ang mga kapitan, altogether, para maghiusa... We have to be one, we have to be together,”

Correct ka Mayor. Giingon nga ato rang mabuntog kining maong pandemic karon, kun magkahisua kitang tanan, ug magtinabangay, pinaagi sa pag-cooperate sa tanang ipabuhat kanato sa kagamhanan. Kay after all, alang man kini sa kaayohan natong tanan.

Dugang ni Labella: “Kalimtan lang unta ang politika. After all kining taga-barangay managsilingan ra man na sila ug  managparentihay pa gayud.”

Bitaw, layo pa kaayo ang election. Nganong sugdan man nato karon ang panagsungi ug panag-away? Hinaut nga kining mga pamahayag ug tinguha ni Labella mo-radiate ug mosantop ngadto sa mga panghunahuna sa mga gitugyanan pagpanghatag sa hinabang.

Kay tingali unya ang didto na sa barangay level mo-andar ug mopatigbabaw na ang pamolitika, ug i-discriminate ang mga kaatbang sa politika.

Aron pagseguro nga dili kasambugan sa politika kining pagpanghatag sa assistance, si Labella mitin-aw nga tulo ka talaan sa mga beneficiaries ang ilang gi-consider: gikan sa MILO, gikan sa barangay captain, ug gikan sa Pantawid Pamilyang Pilipino Program (4Ps) sa Department of Social Welfare & Development (DSWD).

Sa iyang bahin, si Konsehal Councilor Raymond Alvin Garcia nibutyag nga ilang target ang pagpanghatag sa rice assistance ngadto sa 200,000 ka banay sa 80 ka barangay, sa tag-25 kilo nga bugas matag indigent residents sa barangay.

Hinumdoman nga ang dakbayan  nipalit og 200,000 ka sa sakong bugas alang ning maong katuyoan.

Ug alang sa pagpanghatag sa financial assistance ngadto sa mga senior citizens, gipahibawo ni Labella, sumala sa napatik sa The Freeman, ang maong cash distribution himuon karong Abril. Gipangitaan pa’g paagi nga dili mahisupak sa physical distancing nga kamanduan ang pagdasok unya sa mga senior citizen nga modawat sa ilang financial assistance.

Gitahasan pagmugna sa mga paagi nga kalikayan ang pagdasok sa katawhan, sila si City Administrator Floro Casas, City Legal Officer Rey Gealon, ABC President Franklyn Ong, ug mga Konsehal Garcia, Donaldo Hontiveros, Joel Garganera, ug Prisca Niña Mabatid.

Dili ni sayun. Imagine kapin sa 800,000 ka senior citizens ang magtapok sa tagsa-tagsa nila ka barangay, unsaon man ni nga dili sila magkaduol? Sa among barangay pananglitan sa Guadalupe, kapin  sa 5,000  kaming mga senior citizen? Unsaon man ni namo pag-maintain og one meter nga distansiya gikan sa matag-usa kanamo?