Nindot ang gihimo ni Cebu City Mayor Edgar Labella nga mamalit ang Dakbayan sa Sugbo og 100,000 ka sakong bugas humay aron ipanghatag sa mga lumulopyo sa siyudad nga nawad-an og panginabuhian tungod sa Corona Virus Disease.
Daghan ang gipanguyawan nga tingali og gamiton ra kini sa pagpamolitika sa iyang mga kaalyado. Ang gikabalak-an nga basin og pilion ra, ug kadto ra nga ilang mga dumadapig maoy hatagan og bugas. Sigurado ko nga ang mga sakop sa Mayor’s Information and Liaison Office (MILO) mao gyud ang mohimo’g lista sa mga hatagan.
Nasayod sab ko nga sa mga barangay nga ang kapitan dili kaalyado sa mayor, ang pangulo sa MILO wala gyuy maayong pagtinagdanay ug sa mga opisyal sa barangay. Sa ato pa, imposible nga magkahiusa sila sa pagtabang sa mga nanginahanglan.
Unta, karong panahona, ipakita nila ngadto sa publiko nga magkahiusa ang mga opisyal sa barangay ug sa mga gitugyanan sa mayor nga midumala niining MILO diha sa kabarangayan. Ihiklin unta nila ang personal interest, ilabi na niadtong mga nangapilde sa miaging piniliay.
* * *
Nasayod hinoon ko nga gagmay ra kaayong bugas ang mahatag niini ngadto sa katawhan. Maayo na lang kaha kun tag 10 ka kilong bugas ang mahatag sa matag beneficiary. Kun lima man lang gani ka kilo, sus, mora’g para lugaw-lugaw ra gyud na.
Ambot kay wa pa gyud mahibaw-i kun kinsa ang mahimong makapenepisyo ug makadawat sa bugas humay nga pamaliton sa siyudad. Ang mga nagtrabaho sa pribadong mga kompaniya nga nanirado tungod sa Corona Virus Disease, makahimo man sila pagpangayo’g tabang gikan sa Department of Labor and Employment.
Gitagan-an og tag P5,000 nga loan ang matag usa ka kawani sa mga nanirado nga kompaniya gikan sa DOLE. Busa, angay nga hinuktokan gyud pag-ayo sa mga opisyal sa kagamhanan kun kinsa ang hatagan og unang pagtagad sa pagpanghatag og bugas.
* * *
Kun ako ang pahatagon og sugyot, gusto ko nga ang mga night vendors sa Carbon Public Market maoy unahon paghatag og bugas.
Abi ninyo og ngano? Luoy kaayo sila kay apektado ang ilang negosyo sa gipatuman nga curfew gikan sa alas utso sa gabii ngadto sa alas kuwatro sa kaadlawon.
Sigurado ko nga nius-os gyud ang ilang kinitaan ug tingali dili na makasapar sa ilang mga gastohan.
Gitug-anan ko ni Erwin Gok-ong, tsirman sa Cebu Market Vendors Cooperative (CEMVEDCO) sa problema nga gisagubang karon sa iyang mga sakop.
Busa, kun ako maoy pahatagon og sugot, ang mga night vendors, dili lang sa Carbon market, kondili, apil sa ubang lugar maoy unahon sa paghatag og tabang.