Social distancing

Kini ang gimando karon sa atong pangagamhanan kalabot ning maong pandemic sa Corona Virus. Ang nahitabo mao nga ng mga Ceres Bus ug uban pang mga pampublikong mga sakyanan ang ni impose man niini. Mao nga kun mosakay ka karon bag ra nimo tingali ang imong tupad. Daghan ang nasuko  kay kay lagi nganong wala hunongi nga unta luag man. Apan gihimo kini agig pagpanagang.

Sa mga simbahan gipaningkamotan usab nga ma impose kining social distancing.

Mao nga tukma ug haom tingali nga daghanon ang mga Misa aron sa ingon dili maghuot ang mga tawo alang sa ilang kaayohan. Dunay positibo ug negatibong epekto kining maong social distancing.

Positibo

1. Natural matabangan kita sa paglikay sa COVID-19 matud pa2, prevention is better than cure.

2. Ang paggahin og panahon alang sa kaugalingon makatabang sa mas personal ug halawom nga paghunahuna ug pagpamalandong.

Usahay man gud diha sa atong pagpunay og bonding ug kuyog kuyog mahikalimot kita sa bili sa paghilom. Kay kun naa kitay mga kuyog malisud usahay ang paghilom ug pagpamalandong.

3. Ang pagbiya una gikan sa pundok sa kadaghanan paagi man sa pagpalig-on usab sa kaugalingong baruganan. Aron ang hingtungdan makahunahuna og maayo ingon man sa makadaghan.

Negatibo

Ang negatibong epekto niini mao nga kita mahilayo sa usag usa ug mamahimong segurista sa tanan natong pagahimoon. Bisan gani ang yanong ubo ug trangkaso mahimong dudahan man nga Corona. Mahimong masakripisyo ang relasyon tungod ning mga hitaboa. Imbes mamahimong sensitibo sa panginahanglan sa kadaghanan.

Alang kanila  nga maglisud og pagpakabuhi nga halayo sa ilang pamilya ang tingali makasinati sa depresyon nga kun dili mabatanyanan makadala og kamatayon sa kadaghanan dili lang tungod sa Corona kondili sa kasinatiang hinikawan sa tim-os ug mahigugmaong gakus sa imong mahal sa kinabuhi.

Si Lang Leav nagkanayon: “ It was all I wanted for the longest time to open my eyes and to see you there. To stretch out my hand and touch the soft, yielding warmth of your skin.

But now I have learned the secret of distance. Now I know that being close to you, was never about the proximity.”

Dili tiaw kining atong nasinati karon pun-an pa nga anaa na pud naghulga Si Avian Flu N5N6. ning panahon sa krisis angayan unta kitang maghunahuna dili lang sa atong kaugalingong seguridad kondili usab sa kaayohan sa kinabag-an.

Dili paigo ang pagpunay lang og saway kondili ang pagtambayayongay.

Dili paigo ang pagpunay lang pd og pasalig sa kadaghanan apan diay ang maong mga pasalig usa lamang ka dakong bakak…..mahimong layo man tuod kita physically gikan sa usag usa apan pabilin kitang suod sa kasingkasing ug hunahuna labina gyud ning mga panahona.