Mas paspas nga pag-ila sa Covid-19
ARANGKADA - Leo Lastimosa (Banat) - March 6, 2020 - 12:00am

Taliwa sa kalibutanong kalibog sa mga misteryo sa bag-ong kagaw gikan sa Wuhan, China—unsa kapaspas ang tinakdanay, pila na man gyod ang natakdan ug nangamatay ug hangtod kanus-a mang maghasol sa mga molupyo sa nagkadaghang kanasuran—ang China maoy makatanyag sa abundang kasayuran ug mga pagtulon-an.

Kay samtang gidudahan ang kamatinud-anon sa kadagkoan sa China sa pagtug-an sa kinatibuk-ang epekto sa kagaw, sila ang labing unang nahiagom sa pagsulbong sa gidaghanon sa mga nangasakit ug nilampos sila sa pagpahiyos sa bag-ong mga kaso ug sa pagtambal sa labing grabeng mga natakdan.

* * *

Alang sa mga eksperto sa World Health Organization (WHO) nga nakaduaw sa Wuhan ug ubang bahin sa China, di imposible nga masunod sa ubang kanasuran ang kalamposan sa China. Nilampos ang China di tungod sa diktadurang gobyerno ug kakuwang og demokrasya sa nasud. Kon dili tungod sa ilang kapaspas sa pagtultol sa sinugdanan ug pagsulbad sa suliran:

• Kapaspas sa pagpangita sa mga natakdan sa kagaw;

• Kapaspas sa pagbuwag gilayon sa mga pasyente sa di pa makatakod og mas daghan;

• Kapaspas sa pag-ila sa tanang nakaduol ug posibleng natakdan nila.

* * *

Usa sa mga hinungdan sa pagsulbong sa mga kaso sa Covid-19 sa South Korea, Italya, Iran, Japan ug Estados Unidos mao ang samang kapakyas sa Wuhan, ang gigikanan sa kagaw, sa pag-ila sa labing daling panahon kinsa ang mga natakdan na.

Ginamit ang eskandalo sa Wuhan, gilusad sa China ang mas agresibong pagkuha og swab samples sa labing grabeng mga pasyente nga may pneumonia, sa way pagsusi diin nibiyahe ug kinsay naduolan, aron pagtino wa ba silay Covid.

* * *

Pagtulon-an ni angayng sublion sa Department of Health (DOH) sa Pilipinas. Nga hangtod karon nikuha lang og samples gikan sa mga pasyente nga gikan sa kanasuran nga may Covid-19 o nakaduol sa mga natakdan sa kagaw.

Sama sa gihimo sa China, angayng isipon na ang labing grabeng mga kaso sa pneumonia nga Covid, kuhaan og samples aron mahiling dayon sa Research Institute for Tropical Medicine (RITM) ug ubang mga laboratoryo (hinaot nga ang laing upat ka laboratoryo apil na ang Vicente Sotto Memorial Medical Center sa Cebu City may katakos na), sa di pa uwahi ang tanan.

* * *

leolastimosa@gmail.com

CHINA
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with